"As I have no plaisour with long wretting to trouble you, Rycht Honorable, quhois mynd I knaw to be occupyed with most grave maters,[48] so mynd I nott greattlie to lawboure by long preface to conciliat your favouris, quhilk I suppoise I have allreddy, (howsomer rumouris bruit the contrarie,) as it becummeth one member of Chrystis body to have of ane uther. The contentis, thairfoire, of these my presentis sal be absolved in tuo pointis. In the former, I purpois to discharge, in breve wordis, my conscience towardis you: and in the uther, somquhat must I speik in my awin defence, and in defence of that poore floke, of lait assembled in the most godlie Reformed Churche and citie of the warld, Geneva. To you, Sir, I say, that as frome God ye have receavit lyfe, wisdome, honoris, and this present estait, in the quhilk now ye stand, so aucht you whollie[49] to employ the same to the advancement of his glorie, who onlie is the author of lyef, the fountaine of wisdome, and quho most assuredlie doeth, and will honour and glorifie these, that, with sempill hairtis, do glorifie him; quhiche, allace, in tymes past ye have nott doun; bot bein overcum with comoun iniquitie, ye have followed the warld in the way of perditioun. For to the suppressing of Christis trew Evangell, to the erecting of idolatrie, and to the schedding of the blood of Goddis most deare childrein have you, by silence, consented and subscryvit. This youre most horrible defectioun frome the treuth knawin, and anis professed, hath God to this day mercifullie spared; yea, to manis judgement, he hath utterlie forgottin and pardoned the same. He hath not intreated you as he hath done utheris, (of lyke knawlege,) quhome in his anger, (bot yet most justlie, according to thair desertis,) he did schoirtlie stryk efter thair defectioun. But you (gyltie in the same offenses) he hath fostered and preserved, as it wer in his awin bosome, during the tyme of that most miserable thraldome of that professed ennemie of God, mischeivous Marie: and now hath he sett you at such liberty, as the furie of Goddis ennemeis can nott hurt you, except that willinglie aganis his honour, ye tak pleisour to conspyre with thame. As the benefeit quhiche ye hath received is greit, so most Goddis justice requyre of you a thankfull hairt; for seing that his mercie hath spared you, being trator to his Majestie; seing farder, that amanges youre ennemeis he hath preserved you; and, last, seing, although wourthie[50] of hell, he hath promoted you to honoris and dignitie,[51] of you must he requyre (becauis he is just) earnest repentence for your former defectioun, a hairt myndfull of his mercifull providence, and a will so reddy to advance his glorie, that evidentlie it may appeire, that in vaine ye have nott receved these graces of God; to performance quhairof, of necessitie it is, that carnall wisdome and wardly policie, (to the which both, ye are bruitted too muche inclyned,) gif place to Goddis simple and naked treuth. Verry love compellit me to say, that except the Spreit of God purge youre hairt frome that vennum, which your eis have seine to have bein distructioun till utheris, that ye sall nott lang escaip the rewaird of dissembleris. Call to mynd quhatt your earis heard proclamed in the chapell[52]of Sanct James, quhen this verse of the first Psalme was entreated, "Not so, O wicked, nott so; bot as the dust which the wind tossed," etc. And consider, that now ye travaill in the same way which then thai did occupy; plainlie to speak, now are ye in that estait and creddit, in the whiche ye sall ather confort the sorrowfull and afflicted for rychteousness saik, or ellis ye sall molest and oppugne the Spreit of God speaking in his messingeris. The confortares of the afflicted for godlines have promise of confort in thair greatest necessiteis; but the trubleris of Goddis servandis, (how contemned that ever[53]thai appeir befoire the warld,) are threatned to leive thair names in execratioun to the posteriteis following. The examples of the one and of the uther are nott onlye evident in Scriptures, bot also have bein laitlie manifested in England. And this is the conclusioun of that, whiche to youre self, I say, Except that in the cause of Chrystis Evangell ye be found semple, sincear, fervent, and unfeaned, ye sall taist of the same copp, whiche politick headis have drunkein in befoire you.
THE WARST IS NOTT YITT COME.
"The uther poynt concerning my self, and that poore flocke now dispersed, and (as I heir say) rudelie intreated, is this: By dyverse messingeris I have requeisted suche previleges as Turkis comounlie do grant to men of everie natioun; to wit, that fredome sould be granted unto me peceablie to travell throucht England,[54] to the end that with greater expeditioun I mycht repair towardis my awin countrie, quhilk now beginneth to thrist for Chrystis treuth. This requeist I thocht sa reassonable, that almost I had entered the realme without licence demandit; and yeit I understand that it had bein so rejected, that the solistaris thairof did hardlie eschaip empresement.[55] And some of that flocke I heir to be so extremelie handled, that those that most cruellie have shed the blood of Goddis most deare childrein, find this day amangis you greattar favouris then thei do. Allace, this appereth muche to repugne to Christiane cheritie; for quhatsoevir hath bein my offence, this I feare nott to affirme in thair causses, that if ony whiche have suffered exyle in these most dolorus dayis of persecutioun, deserve prais and commendatioun, for peace, concorde, sober and quiet liveing, it is thei. And as for me, how criminall that ever I be in Goddis presence, for the multitude of my synnes; yet befoire his justice-seat I have a testimonie of guid conscience, that sence my first acquentance with England, willinglie I never offended persone within it, (except in oppin chayre to reprove that whiche God condemneth) can be judged offense. But I have, (say you,) wreittin a treassonable [booke] aganis the Regiment and Impyre of Women: If that be my offense, the poore flocke is innocent, (except suche as this day do fastest cry treasoun:) For, Sir, in Goddis presence I wreitt, with none in that cumpany did I consult befoire the finisheing of the same; and, thairfoire, in Chrystis name, I requyre that the blame may ly upoun me allone. The wreitting of that Booke I will nott deny, but to prove it treassonable I think it salbe hard. For, Sir, no more do I doubt of the treuth of my principall propositioun, then that I doubt that this was the voce of God whiche first did pronunce this penaltie aganis woman, "In doloure sall thou beare thy chyldrein." It is bruitted, that my Booke is or salbe writtin against. Yf so be, Sir, I greatlie feare that flattereris sall rather hurte nor mend the mater, which thei wald seame to mainteine; for, except that my error be plainlie schawin and confuted be better authoritie then by suche lawis as frome yeir to yeir may and do change, I dar nott promitt silence in so wechtie a besines, leist that in so doing, I sall appear to betray the verretie whiche is not subjected to the mutabilitie of tyme. And if ony think me ather ennemye to the Persone or yet to the Regiment of her quhome God hath now promoted, thei are utterlie deceived of me. For the miraculouse wark of God, conforting his afflicted by ane infirme veschell, I do acknawlege, and the power of his most potent hand (raiseing up quhome best pleiseit his mercie to suppresse such as fecht aganis his glorie) I will obey, albeit that boyth nature and Goddis most perfyt ordinance repugne to suche regiment. Moir plainlie to speik, yf Quene Elizabeth sall confesse, that the extraordinarie dispensatioun of Goddis great mercie macketh that lauchfull unto her, whiche boyth nature and Goddis law do deny to all women, then sall non in England be more willing to mainteine her lauchfull authoritie then I salbe: But yf (Goddis wonderouse werk sett asyd) scho ground (as God forbid) the justnes of her title upoun consuetude, lawis, or ordinances of men; then I am assured, that as suche foolishe presumpcioun doeth heyghlie offend Goddis supreame majesty, so do I greatlie feare that her ingratitude sall nocht lang lack punishement. And this in the name of the eternall God, and of his sone Jesus Chryst, (befoire quhome boyth you and I sall stand, to mak accomptes of all counsall we geve,) I requyre you to signifie unto Her Grace in my name; adding, that onlie humilitie and dejectioun of herself before God salbe the firmitie and stabilitie of her throne, quhilk I knaw sall be assulted mo wayis then one. Yf this ye conceill[56]frome Her Grace, I will mak it patent to the warld that thus far I have communicated with you, haveing also farther to speik, yf my weik judgement may be hearde. Allace, Sir, is my offense (althocht in that tyme, and in that mater, I had writtin ten bookis) so haineuse that I can nott have licence, by preacheing of Christ Jesus, to refreshe thoise thrustye saulles whiche long have laicked the watter of lyffe. No man will I presentlie accuse; butt I greatlie fear, that the leprouse have no plaisour to behald thair faces in the cleir glasse. Lett none[57]be affrayed that I requyre to frequent the Courte, ather yet of any continuance to remaine in England; but onlye thristis in passing furthe to my awin native countrie to communicat with you and sum uther, suche thingis as willinglie I list nott to committ to paper, neither yet to the knawledge and creddit of many; and then, in the Northe pairtes, to offer Goddis favouris to suche as I suppoise do murne for thair defectioun. And this I trust salbe no less profitable to Her Grace, and to all godlie within England, then it sould be pleiseing to me in the flesche.
"This is the thrid tyme that I have beggit licence to visite the hungrie and thristie amangs you, whiche, yf now be denyed, as befoire God I have a testimonie, that so muche I seik nott myself, as the advancement of Chrystis Evangell, and the conforte of suche as quhome I knaw afflicted; so sall the godlie understand that England, in refuseing me, refuseth a friend, how small that ever the power be. The mychtie Spreit of the Lord Jesus muve youre hairte deaplie to consider youre dewtie unto God, and the estait of that Realme in whiche, by his appointement, ye now serve. From Deape, the [22d[58]] of Aprile 1559.
(Sic subscribitur,)
"Youris to command in godlines,"Jhone Knox."
To this letter was no answer maid; for schorte thairefter the said Jhone Knox maid forduard to Scotland by sea, where he landed the thrid day of Maij;[59] and had suche successe as in the Secound Booke is declaired. The said Jhone being in Sanctandrois efter Cuper Mure,[60] entred in deipe discourse with the Laird of Grange: the dangeris war evident, butt the supporte was nott easie to be seine. Efter many wordis, Jhone Knox burstit furth as followis: "Yff England wald foirsie thair awin comoditie, yea, yf thai did consider the danger quhairin thei thameselfis stand, thai wald nott suffer us to perishe in this quarrell; for France hath decreit no less the conquest of England then of Scotland." After long reassoning, it was concluded betuix thame two, that supporte sould be cravit of England; and for that purpois, the said Laird of Grange first wreit to Sir Harie Percie,[61] and efter raid frome Edinburgh and spak with him; to quhome he maid so plaine demonstratioun of the danger appeiring to England, that he tooke upoun him to wreit to the Secretarie Cycill; quho with expeditioun returned answer bak agane, geving him to understand, thatt oure interpryse altogitther myslyked nott the Counsall, albeit that thei desyrit farther resolutioun of the principall Lordis. Whiche thing understand, it was concluded by some[62]to wreitt unto him plainlie oure hoill purpois. The tennor of oure letter was this:—
LETT THE ENNEMYE SAY, GIF THAIR HOPE BE NOTT FRUSTRAT.
The first Letter to [Sir] Willyaume Cycill, fra the Lordis of the Congregatioun.
"The contentis of a letter direct by you (rycht worschipfull) to Sir Harie Percie, was notifeid unto us by Mr. Kircaldie of Grange, this Sonday the [16th[63] of Julij, by the whiche we perceave, that the said Grange, of zeill and faithfull hairt whiche he bereth to the furtherance of this our great, and, befoire the warld, dangerous interpryse, hath travelled with you as with ane unfeaned favorer of Chrystis trew religioun, and of the libertie of our countrye, for knawlege of your myndis towardis us, incais that we be assaulted by ony forayne invasioun, or greater power then we be weill able to resist. Youre confortable answer to this questioun we have considered, to our joy and conforte, as also youre motiouns, and quhatt ye demand; to witt, What we, the Protestantis within this realme, do purpois? To quhatt end we meane to directe oure actiouns? How we will, and how we be[64] able to accompleis the same? What doubtis we have of ony adversare powar? And finallie, incais that supporte sould be send frome you, what maner of amytie mycht insew betuix these twa realmes? To the whiche in breve we answer, That oure hoille and only purpois (as knaweth God) is to advance the glorye of Chryst Jesus, the trew preaching of his evangell[65] within this realme; to remove superstitioun, and all kynd of idolatrie;[66]to brydeill to our poweris the furie of those that heirtofoir have cruellie sched the bloode of our bretherein; and, to our utermest, to meanteine the libertie of this oure countrye frome the tirranie and thraldome of strangeris, as God sall assist us. How we [sall] be able to accompleiss these premisses, is to us unknawin; onlye oure hoip is guid that He that hes begune this guid wark in us, and hathe, by his power, to this hour confounded the faces of our adversaries, will performe the same to his glorie, whiche chieflie we seik in this oure interpryse. Because we suppoise, that neither oure present danger, neither yett the weirlyke preparatioun whiche France maketh aganis us, be hyd frome you nor frome the Counsall, we omitt that pairt. As tuicheing the assurance of a perpetuall amity to stand betuix these twa Realmes; as no earthlie [thing] of us is more desyred, so crave we of God to mak us instrumentis by whiche this unnaturall debaite, whiche long hath continued betuix us, may anis be composed, to the prais of Goddis name, and to the confort of the faithfull in boyth realmes. And gif youre wisdomes can foirsie and devyse the meanes and assurances, how the same may be brocht to passe; perswade youreselfis, not onlye of oure consent and assistance, but also of oure constancie, as men may promeise, to oure lyves end; yea, and farther, of a charge and commandement by us to be left to oure posteritie, that the amity betuix [us], in God contracted and begun, may be by thame kept inviolat for ever. And for the revolting frome you to France, whiche yee seeme to fear and suspect, at thair pleisour, we utterlie abhor that infidelitie; for now doeth the voyce[67] of God continualie sound in our earis, 'That suche as profaine the terrible and reverent name of God, sall nott eschaip veangence.' Oure confederacie, amitie, and leigue, sall nott be lyke the pactions maid by wardlie men for wardlie proffeit; but as we require it for Goddis caus, so will we incall his name for the observatioun of the same. Moirover, gif we sould laike any thing to temporall commoditie, yitt sould we never have occasioun to returne to thame; ffor we now perceave and feill the wecht of thair yoke, and intend (by Goddis grace) to cutt away suche instrumentis[68] as by quhome this realme wes befoire abused. Trew it is, that as yeit we have maid no mentioun of ony change in Authoritie, neither yeit were we myndit to [do] any suche thing, till extreme necessitie compelled us thairto: but seing it is now more than evident, that France, and the Quene Regent heir, with hir preistis, pretend to nothing bot the suppressing of Chrystis Evangell, the ruyne of us, and the subversioun of [this] poore realme; committing oure innocencie to God, and unto the judgment of all godlie and naturall men, we are determined to seik the nixt remedie, in whiche we hairtlie requyre youre counsaill and assistance. And this far we have interprysit, to mak you participant of oure purpois; becauis in the said letteris you requyred of the [said] Mr. Kirkcaldie sum farther assurance then his awin woord of wreitting, whiche we dout nott bot ye sall schoirtlie receave frome mo then frome us. We dar nott haistellie mak the whole assemblie, neither of noblis, neither of barronis, prevy in this cause, for dangeris that may insew by policie and craft of the adversaries; youre Wisdomes, we doubt not, will communicat these onlye, with suche as ye knaw favoraris of such ane godlie conjunctioun. It should much help in oure opinioun, gif the preacharis boyth in persuasioun and in publict prayeris, (as ouris do heire,) wald commend the same unto the peopill. And thus, efter oure humill commendatiounis to the Quenis Majestie, (quhois reigne we desyre to be prosperous and long, to the glorie of God, and conforte of his Churche,) we hairtlie committ you to the protectioun of the Omnipotent. Fra Edinburgh, the [19th[69]] of Julij 1559."
With this oure letter,[70] Jhonne Knox wreat two, one to the said Secratarie, and ane uther to the Quenis Majestie hirself, in tennour as efter followis:
Jhone Knox[71] secound Letter to Mr. Cycill, for deliverance of ane uther to the Quein of England.
"With my humill commendatiounis. Pleise you, Sir, to delyver this other letter inclosit to the Quenis Grace. It containeth in few and in semple wourdis my confessioun, quhat I think of hir Authoritie, how it is just, and quhat may mak it odious in Goddis presence. I heir that thair is ane Confutatioun sett furth in prent aganis 'The First Blast.'[72] God grant that the wreitter have no more socht the favoris of this present estait, no less the glorie of God, and the stable commoditie of his countrey, then did he quho enterprysed in that 'Blast' to utter his conscience. When I sall have tyme, (whiche now is sumquhatt precious unto me,) to peruse that werk, I will communicat my judgement with you.
"The tyme is now, Sir, that all that either thrist Chryst Jesus to reigne in this yle, or yett the hairtes of the inhabitantes of the same to be joyned togidder in love unfained, aucht rather to studie how the same mycht be brocht to passe, then vanelie to travaill for the mantenance of that, quhairof we have allreddy seine the danger, and felt the smarte. Gif the most pairt of women be wicked, and suche as willinglie we wald nott reigne over us; and gif the most godlie, and suche as have rare graces be yett mortall, we aucht to tak heid, least in establissing one judged godlie and profitable to hir countrey, we mak ane entres and tytill to mony; off quhome not only sall the treuth be impugned, bot also sall the countrey be brocht in bondage. God give you, and utheris favoraris of your countrey, eyis to foirsee, and wisdome to avoyd the dangeris appeareing.
"By dyverse [letteris], I have requyred licence to have visited the North pairtis of England; but as yitt I have ressaved no favorabill answer.[73] The longer, Sir, that it be delayed, the less conforte sall the faithfull thair receive, the weaker sall the Quenis Grace be. Gif I war nott to hir Grace are unfeaned friend, I wald not instantlie begg suche libertie, whiche to me I knaw sall neither be profitable nor pleising in the flesche. The estait of thingis here comoun, I dout nott ye knaw. Some thingis I have, (as oft I have wreitten,) whiche gladlie I wald communicat, quhilk I mynd nott to committ unto paper and ynk: find, thairfoir, the meanis that I may speik suche one as ye will credit in all thingis. The grace of the Lord Jesus rest with you.
"I hairtlie beseik you to have my service humblie commended to the Quenis Grace; adding, that quhosoever maketh me odious to hir Grace, seiketh somequhatt besydis the glorie of God, and hir Grace's prosperitie; and thairfoir can nott be assured and unfayned freindis. From, &c."
The letter sent be the said Jhonne, to the Quenis Majestie of England, being inclosed in the foirsaid Mr. Cycillis letter.