Albeit the said Jhone ressaved this letter at Berwyk, yett wald he answer no thing till that he had spokein the Lordis; quhome he fand in Striveling, and unto quhome he delyvered the answer send from the Counsall of England; (for Alexander Quhytlaw tuik seakness betwix Berwyk and Edinburgh, and was troubled be the Lord Seatoun, as in the formar booke is declaired.[90]) The answer send by Maister Cycill, was so generall, that many amanges us war dispaired of ony comforte to come from that countrey; and thairfoire war determined that thei wald requeast no farder. Jhone Knox laboured in the contraire;[91] but he could prevaill no farther, but that he should have licence and libertie to writt as he thocht best. And so tuik he upoun him to answer for all, in forme as follows:—
Answer to Mr. Cycillis Letter.[92]
"Two causes impeded me, Richt Worschipfull, to visite you at any pairt of England. Formar, no significatioun of your mynd and plaisour was maid unto me, for only did Sir Harye Percye[93] will me to cum and speak him, which, convenientlie at that tyme I could nott do, be reasone that the Frenche men, (which was the Secound cause of my stay,) did then most furiouslie persew us, whill our company was dispersed; and then durst I nott be absent for dyverse inconvenientis. Neather did I think my presence greatlie necessarie with you, considdering that the mater, which I desyred maist, was opened and proponed. To the quhilk I wald have wished that a more plaine and especiall answer should have bein maid. For, albeit Mr. Quhitlaw, by his credite, Mr. Kirkcaldie, by his letter, and I, boyth by letteris, and by that which I had ressaved from Sir James Croftis, did persuade your goode mindis; yitt could not the Counsall be uthairwayis persuaded, but that this alteratioun in France had altered your former purpois. It is nott unknawin what favor we three do beare to England; and, thairfoir, I wishe, that rather your pen then our credite, or ony thing writtin to ony of us, should assuire the Lordis and otheris, of your goode myndis, (who ar bot now in nomber fyve hundreth). Onless that money be fournissed without delay to pay the soldiouris with, for thair servise bypast, and to reteane ane uther thousand footmen, with three hundreth horsmen, till some stay be had in this danger, these gentilmen will be compelled to leave the feildis. I am assured, as fleshe may be of fleshe, that some of thame will tak a verry harde lyve befoir that ever they compone eather with the Quene Regent, eather yitt with France; but this I dar nott promeise of all, onless in you they see a greatter fordwardness. To support us will appeir excessive, and to break promeisse with France, will appeir dangeruss. But the loss of expensses, in my opinioun, aucht nott to be esteamit from the first payment; neather yitt the danger from the first appearance. France is most fervent to conqueise us, and avoweth, that against us thei will spend thair Croune, (so did my awin earis heare Buttencourt brag[94]). But, most assuredlie I knaw, that onless by us thei thocht to mak ane enteress to you, that thei wald nott bye oure povertie at that price. Thei labour to corrupt some of oure great men by money, (and some of oure nomber ar poore, as befoire I wraitt, and can nott serve without supporte); some thei threattin; and against utheris thei have raised up ane partie in thair awin countrey. In this meane tyme, gif ye lye by as neutrallis, quhat wilbe the end, ye may easellie conjecture. And, thairfoire, Sir, in the bowellis of Christ Jesus, I requyre you to mak plaine answer; What the gentillmen heir may lippin to, and quhatt the Quenis Majestie will do, may without long delay be put in executioun. Rest in Christ Jesus. Off Sanct Johnstoun, the &c. day of, &c."[95]
Answere with great expeditioun was returned to this letter, desyring some men of credite to be sent frome the Lordis to Berwyk,[96] for the receaving of money for the first supporte, with promeise, that gif the Lordis of the Congregatioun meant no utherwyse then befoire thei had writtin, and gif thei wald enter in league with honest conditionis, thei sould neather lack men nor money to thair just caus. Upoun this answer, was directed from the Lordis to Berwik, Maister Henrye Balnaves, a man [of] goode credit in boyth the realmes, who suddenlie returned with such a somme of money as served all the publict effaris till November nixt; when Jhonne Cokburne of Ormistoun send[97] for the second supporte, and receaving the same, unhappelie fell in to handis of the Erlle Bothwell, was wounded, tane, and spoilzed of a great somme.[98] Upoun whiche mischance followed all the rest of oure troubles befoire rehersed.
In the Secound Booke preceading, we have declaired how Secretarye Lethingtoun[99] was directed to England: but one thing we have befoire past by. In that, oure greatest dejectioun, this ordour was tackin, That the Duike his Grace, the Erlle of Glencarne, Lord Boyd, Lord Uchiltrie, and thair freindis, should remain togither at Glaskow, for conforte of the countrey, and for geving of answeris, as occasioun should requyre; and that the Erlle of Arrane, the Lord James, the Erlle of Rothess, the Maister of Lyndsay, and thair adherantes, should continew togither within Fyffe, for the same causses, that advertissementis mycht go frome the one to the other, as neid requyred. In the negotiatioun of the Secretary Lethingtoun with the Quene and Counsall of England, (in whiche he travailed with no less wisdome and faithfulnes then happy successe,) mony thingis occurred that requyred the resolutioun of the hole Lordis,[100] amanges which thair was one quhairof befoir no mentioun is maid.
Efter that the Quene and Counsall of England had concluded to send thair army into Scotland, for expelling of the Frenche, the Duke of Northfolk was sent to Berwyk,[101] with full instructionis, power, and commissioun, to do in all thingis concerning the present effaris of Scotland, as mycht the Quene and Counsellis in thair awin personis[102] do. Heirupoun the said Duke requyred sicke a pairt of the Lordis of Scotland, as had power and commissioun from the whole, to meet him at suche day and place as pleised thame to appoint. This advertissement came first to Glaskow, by the meanis of the Maister of Maxwell. Quhilk redd and considdered by the Lordis, conclusioun was takin, that thei wald meitt at Carleill;[103] and that was the procurement of the said Maister of Maxwell, for his ease. Heirupoune war letteris direct fra the Lordis, lyeing in Glaskow, to Lord James, requyring him, with all possible expeditioun, to repair towardis thame for the purpois foirsaid. Which letteris redd and advised upoun, commandment was gevin to Jhone Knox to mak the answer: For so it was appointed at the devisioun of the Lordis, that he should answer for the pairte of thoise that war in Fyffe; and Maister Henrye Balnaves for the pairte of thame that abaide at Glaskow. The said Jhone answered as followis:—
"To the Lord Duke his Grace, and the Lordis at Glaskow.
"After humill commendatioun of my service. Albeit I have writtin ofter then anes to Mr. Henrye Balnaves, what thingis have myslyked me in youre slaw proceideings, alsweill in supporting youre brethrein, quho many dayes have susteined extreame danger in these pairtes, as in making provisioun how the ennemye mycht have bein annoyed,[104] quho lay in few nomber nye to youre quarteris in Striveling; and in making lykewayis provisioun, how the expectatioun of your freindis, quho long have awaited for youre answer, mycht have bein satisfied;—Albeit, (I say,) that of thoise thingis I have befoire complained, yet of verry conscience, I am compelled to signifie unto youre Honoris, that onless of these, and other inormiteis, I sall espye some redress, I am assured that the end shalbe suche as godlie men shall murne, that ane good cause shall perishe for lack of wisdome and diligence. In my last letteris to Mr. Henrye Balnaves, I declared, that youre especiall freindis in England wounder that no gritter expeditioun is maid, the weycht of the mater being considdered. Gif the falt be in the Lord Duke, and his freindis, I wrait also, that the greatest loss should be his and thairs in the end. And now, I can nott cease, boyth to wonder and lament, that youre hoile Counsall was so destitute of wisdome and discretioun as to charge this poore man, the Priour,[105] to come to you to Glaskow, and thairefter to go to Carleill, for suche effearis as ar to be entreated. Was thair none amangis you, quho did foirsee quhat inconvenientis mycht insew his absence frome these partis? I cease to speake of the dangeris in the ennemy. Youre freindis have lyen in the Frith now xv. dayis bypast, (what was thair formar travaill is nott unknawin); thei have never receaved conforte of any man (him only excepted), more then thei had lyen upoun the coast of thair mortall ennemye. Do ye nott considder, that suche a companye sall neide conforte and provisioun from tyme to tyme? Remove him, and quho abydeth that cairfullie will travaill in that or any uther wechty materis in these pairtis? Did ye nott farther considder, that he had begune to meddle with the gentilmen[106] who had declaired thameselfis unfreindis heirtofoir; and also that ordour wald have bein taekin for suche as haif bein neutrall: now, be reassoun of his absence, the one shall escaip without admonitioun, and the other shalbe at thair formare libertie? I am assured that the ennemye sall nott sleip, neather in that nor in uther effairis, to undermynd you and your hoile caus; and especiallie to hurte this pairt of the countrey to revenge thair formare foly. Gif none of these formar causses should have moved you to have considered that such a journay (at suche a tyme,) wes nott meet for him, neather yit for thame that must accompany him; yit discreit men wald have considdered, that the men that have lyen in thair jackes, and travailled thair horse continuallie the space of a moneth, requyreth some longer rest, boyth to thame selfis, but especiallie to thair horsses, (befoire thei had bein charged to suche a journey,) then yitt they have had. The Priour may, for satisfactioun of your unreasonable myndis, interpryse the purposse; but I am assured, he shall nott be able to have sex honnest men in all Fyiff to accompany him: And how that eather standis with youre Honoris, or with his safetie, juge ye youre selfis. But yitt, wonder it is, that ye did nott considder, to quhatt paine and fascherie shall ye putt youre freindis of England, especiallie the Duke of Northfolke, and his Counsall, whome ye shall caus travaile the most wearesoum and fasschous gaitt that is in England. In my opinioun, quhosoever gaif you that counsall eather laicked rycht judgement in thingis to be done, or ellis had too much respect to his awin ease, and too small regaird to the travaill and danger of thair bretherein. A comoun cause requireth a comoun concurrance, and that everie man beare his burdein proportionablie. But prudent and indifferent men espy the contrair in this caus, especiallie of lait dayis; for the weakest ar maist greavouslie charged, and to quhome the mater maist belongeth, and to quhome justlie greatest burthein is dew, ar exempted in a manor boyth from travaill and expensses. To speik the mater plainlie, wyse men do wonder what my Lordis Dukis freindis do meane, that thei ar so slaike and backward in this caus: In uther actionis, thei have bein judged stout and fordward; and in this, whiche is the greatest that ever he or thei had in hand, thei appeir destitut bayth of grace and of courage. I am nott ignorant, that thei that are most inward of his counsall ar ennemyes to God, and thairfoire can nott bot be ennemyes to his cause. But wounder it is, that he and his uther freindis should nott considder, that the tinsale of this godlie interpryse, shalbe the routing of thame and thair posteritie frome this realme. Considdering, my Lordis, that by Goddis providence ye ar joyned with the Dukis Grace in this comoun cause, admonishe him plainlie of the danger to cum: will him to beware of the counsale of those that ar plainlie infected with superstitioun, with pryde, and with vennome of particulare proffeit; whiche gif he do not at your admonitioun, he shall smarte, befoir he beware: and gif ye cease to putt him in mynd of his deutie, it may be that, for youre silence, ye shall drynk some portioun of the plague with him. Tak my plaine speking, as proceeding from him that is nott youre ennemye, being also unceartaine when I shall have occasioun to writt heareafter. God, the Father of oure Lord Jesus Christ, assist you with the spreit of wisdome and fortitude, that to his glorie, and to youre Lordschipis and oure commoun conforte, ye may performe that thing, which godlie wes ones begun. Amen. From Sanctandrois, the vj. of Februare, in haist, 1559.[107]
(Sic subscribitur,)
"Your Lordschipis to command in godliness,
"J. K."
Upoun the receatt of this letter, and consultatioun had thairapoun, new conclusioun was tackin: to witt, that thei wald viseit the said Duke of Northfolke at Berwyke,[108] quhair he was.
Thus far have we digressed fra the style of the Historie, to lett the posteritie that shall follow understand, by quhat instrumentis God wrocht the familiaritie and freindschipe, that after we fand in Ingland. Now we returne to oure formare Historie.