The names of the Nobilitie and Lordis that war present at the maiking of the foirsaidis Actis[726] heirefter followis:—

James Duk of Chattelarault,
George Erle Huntlye,
Archibald Erle Ergyle,
Williame Erle Merschell,
Johne Erle Atholl,
Williame Erle Montrose,
James Erle Mortoun,
Alexr. Erle of Glencarne,
James Commendator of Sanctandrois and Pettinweme,
Johne Lord Erskyne,
Johne Ballendyne of Auchnowll knyght Justice Clerk,
The Thesaurar,
The Cleark of Registre, and
The Secretar.[727]

After the first Act,[728] the Erle of Huntley said, jestinglie, "Good day, my Lordis of the Twa parte."

The hoill Rentallis being gathered, the sowme of the Thrid, according to thair awin calculatioun, was found to extend to....[729]

JOHNE KNOX HIS JUDGEMENT OF THE THRIDDIS.

The Ministeris, evin in the begynnyng, in publict Sermonis opponed thame selves to suche corruptioun, for thei foirsaw the purpose of the Devill, and clearlie understood the butt whairat the Quene and hir flatteraris schot; and so in the stoolle of Edinburgh, Johne Knox said, "Weill, yf the end of this ordour, pretended to be tacken for sustentatioun of the Ministeris, be happy, my judgement failleth me; for I am assured that the Spreit of God is nott the auctor of it; for, first, I see Twa partis freely gevin to the Devill, and the Thrid maun be devided betwix God and the Devill: Weill, bear witnes to me, that this day I say it, or it be long the Devill shall have Three partis of the Thrid; and judge you then, what Goddis portioun shalbe." This was ane unsaverie saying in the earis of many. Some eschamed nott to affirme, "The Ministeris being susteaned, the Quene will nott gett at the yearis end to by hir a pair of new schoes." And this was Secreatarie Lethingtoun.

LET THIS BE NOTTED

Thair war appointed to modifie the Ministeris stipendis,[730] the Erles Ergyle, Murray, and Mortoun, Lethingtoun, the Justice Cleark, and Cleark of Registrie. The Laird of Pittarro was appointed to pay the Ministeris stipendis, according to thair modificatioun. Who wold have thought, that when Joseph reulled Egypt, that his brethren should have travailled for vittallis, and have returned with empty seekis unto thair families? Men wold rather have thought that Pharao's pose, treasure, and garnallis should have bene diminished, or that the houshold of Jacob should stand in danger to sterve for hungar.

ANE PROVERBE.