DEPOSITIONS CONTRE COLLAS BECQUET.
Le xvij Mai 1617.
Susanne Le Tellier, veufve de Pierre Rougier, depose que son mary estant decedé, trouva des sorcerots en son lict; et qu'en son djt lict mortuaire, il se plaignoit esté ensorcelé par Collas Becquet, avec lequel avoit eu dispute, sur laquelle dispute luy dyt que s'en repentiroit; et la dessus fut prins de m...[A] duquel fut douze jours malade; qu'ils trouverent quarante-quatre sorcerots en l'oreiller de son enfant, que les uns estoyent fait comme herissons, les autres comme pommes, et les autres plats comme la rouelle de la main; et du fill de chanvre entortillé avec de plumes.
Susanne, femme de Jean Le Messurier, depose que son mary et Collas Becquet plaiderent à jour passé ensemble; qu'allors ils avoyent ung enfant ayant de viron six semaines, et comme elle le despouilloit au soir, pour le coucher, il tomba sur l'estomac du djt enfant une beste noire laquelle fondit si tost que fut tombée, d'aultant qu'elle fist debvoir de la rechercher et ne peut jamais apercevoir qu'elle devint; incontinent l'enfant fut prins de mal et ne voulu teter, mais fut fort tormenté; que s'estant avisée de regarder dans l'oreiller du djt enfant y trouverent des sorcerots cousus de fil, et les ayant tirés et bien espluché la plume de l'oreiller, y regarda sept jours appres et y entrouva derechef avec une febve noire percée; dequoy, ayant le djt Becquet ouy qu'il en estoit suspecté, sa femme vint ches la deposante comme le djt Becquet estoit à la mer, et luy djt qu'à raison du bruit que la deposante avoit sucité sur son mary, iceluy Becquet fuetteroit le djt Mesurier, son mary, et elle, et les tueroit; qu'apres cela la deposante fut ches eux leur dire que ne les craignoit, ny luy ny elle, de ce qu'ils la menacoyent de tuer son mary et elle; qu'ayant la deposante un jour six grands poulets qui couroyent appres leur mere, ils sortirent de leur maison et revinent au soir; et un à un se mirent a saulter en hault contre la cheminée et manget la scie, qu'ils moururent tous un à un, à voy ...[B] comme ils sautoyent, jusques au dernier qui dura en vie jusqu'à une heure devant le jour qu'il mourut; que depuis que l'eurent declare à Mr Deljsle et les eut menacés, il a amendé à son enfant et se porte bien.
Collas Rougier depose que son frere Piere Rougier en mourant chargeoit Collas Becquet de sa mort.
Collas Hugues raport qu'estant en une nopsce y survint Collas Becquet jouet avec sa belle-fille, laquelle le rebouta; et des le mesme soir elle fut frapée de telle facon qu'on pensoit qu'elle mourust à chacune heure; qu'elle est demeurée mechaignée de coste, et trouva un des sorcerots en son lict, qui pour lors furent monstrés à Messrs de Justice qui estoyent à tenir des veues à St. Pierre; que la djte fille tomboit quelque fois y terre toute aveuglée.
La femme du djt Hugues depose tout de mesme que son mary.
Jean De Garis, fils Guillaume, depose qu'il y a viron deux ou trois ans qu'ayant presté quelque argent sur un gage à Collas Becquet, luy demandant son argent, ou qu'il feroit ventiller son gage; luy repartit le djt Becquet à feray donc ventiller autre chose; qu'estant le djt de Garis arivé en sa maison, trouva la fille malade et affligée; qu'ils trouverent des sorcerots et aultres brouilleries par plusieurs fois à l'oreiller de leur enfant; mais que la mere du djt Becquet estant venue en la maison du djt de Garis, luy donna à boire de l'eau et la moitié d'un pain comme avoit esté conseillé de faire; depuis ne trouverent plus rien à l'oreiller du djt enfant; toutesfois pour eviter les djts sorcerots, ont toujours depuis couché leur enfant sur la paille; croit que ce mal leur ariva par leur moyen.