Iohn Parkinson.
Ioanni Parkinsono Pharmacopæo Londinensi
solertissimo Botanico
consummatissimo
T.D.M. S.P.D.
Poema panegyricum Opus tuum indefessi laboris, vtilitatis eximiæ postulat, & meriti iure à me extorqueret (mi Parkinsone) si fauentibus Musis, & secundo Apolline in bicipiti somniare Parnasso, & repentè Poetæ mihi prodire liceret. In fœtus tui bonis auibus in lucem editi, & prolixiorem nepotum seriem promittentis laudes, alii Deopleni Enthusiastæ carmine suos pangant elenchos; quos sub figmentis ampullata hyperbolicarum vocum mulcedine, vates serè auribus mentibusne insinuant. Veritas nuditatis amans, fuco natiuum candorem obumbranti non illustranti perpetuum indixit bellum: In simplicitate, quam assertionum neruosa breuitas exprimit, exultat. Audi quid de te sentiam, Tu mihi sis in posterum Crateuas Brittannus; inter omnes quotquot mihi hic innotuerunt, peritissimus, exercitatissimus, oculatissimus, & emunctissimæ naris Botanicus: Cuius opera in fortunata hac Insula rem herbariam tractari, emendari, augeri, & popularibus tuis vernaculo sermone ad amussim tradi, non decentiæ modo, sed etiam necessitatis est. Macte tua sedulitate (Vir optime) neque te laborum tam arduis lucubrationibus datorum hactenus pœniteat, vel deinceps impendendorum pigeat. Difficilia quæ pulchra. Leniet debitæ laudis dulcedo vigiliarum acerbitatem, & Olympicum stadium cito pede, à carceribus ad metas alacriter decurrentem nobile manet βραβεῖον. Sed memento Artem longam, Vitam esse breuem. Μηδὲν ἀναβαλλόμενος. Vide quid ad antiquum ilium, cuius si non animam, saltem genium induisti, Crateuam scribat Hippocrates, Τέχνης πάσης ἀλλότριον ἀναβολὴ ἰητρικῆς δὲ καὶ πάνυ, ἐν ᾗ ψυχῆς κίνδυνος ἡ ὑπέρθεσις. Nobilissimam Medicinæ partem Botanicam esse reputa. Floræ nunc litasti & Pomonæ, Apollini vt audio propediem Horto Medico facturus. Amabò integræ Vestæ sacra conficito, eiusque variegatum multis simplicium morbifugorum, myriadibus sinum absolutè pandito, quem sine velo nobis exhibeas. Nulla dies abeat sine linea. Sic tandem fructus gloriæ referes vberrimos, quos iustè sudoribus partos, vt in cruda & viridi senectute decerpas diu, iisque longum fruaris opto. Vale. Datum Londini Calendas Octobris anno salutis 1629.
Theodorus de Mayerne Eques aurat. in Aula Regum Magnæ Britanniæ Iacobi & Caroli P. & F. Archiatrorum Comes.
