diu edel küneginne bat und ouch gebōt
daȥ siȥ mīden solden, die recken vil gemeit.
dō siȥ niht lāȥen wolden, daȥ was ir wærlīchen leit.
Si sprach: ‘herre Sigemunt, ir sult iȥ lāȥen stān
unz eȥ sich baȥ gefüege: sō wil ich mīnen man
immer mit iu rechen. der mir in hāt benomen,
wirde ich des bewīset, ich sol im schedelīche komen.
Eȥ ist der übermüeten hie bī Rīne vil:
dā von ich iu des strītes rāten niht enwil.
si habent wider einen ie wol drīȥec man.