“‘Strict’s no’ the word for’t! If a blood-curdler on probation was kent to gang to his work wi’ the smell o’ drink aff him, he wad lose his job:’ and he helped himsel’ to anither dram.
“‘Weel, ye’re no’ blate ony wye,’ says I.
“‘Blate! Catch me,’ says he. ‘I wadna need to be blate at this tred, I’m tellin’ ye. Jist you think o’ the kind o’ customers we hae to dale wi’! They wad sooner see a tax-collector comin’ into their hooses than yin o’ us chaps. There’s some hooses ye hae to gang to work in where it’s easy. I ken a ghost that’s been fifteen years on the same job, and gettin’ fat on’t. He has the name o’ bein’ the best white-sheet ghost in the Depairt-men’, and he’s stationed in an auld castle up aboot the Hielan’s, a job he got because he had the Gaelic. He made it sae hot for the folk, walkin’ aboot their bedrooms at a’ ‘oors o’ the nicht, that naebody’ll stay in the place but himsel’ and an auld deaf and dumb housekeeper. There’s naething for him to dae, so he can lie in his bed a’ nicht and no’ bother himsel’ aboot onything. It’s a very different thing wi’ anither chap I ken—a chain-clanker in England. He has to drag ten yairds o’ heavy chain up and doon stairs every nicht; and it’s no easy job, I’m tellin’ ye, wi’ the folk the hoose belang to pappin’ things and shootin’ at whaur they think the soond comes frae. Oh ay! there’s a great run on the best jobs. My ain ambeetion is to be in the clammy-hand brench o’ the business in some quate wee place at the coast. I hae my eye on a likely thing at Rothesay. Of course the clammy hand’s no’ a very nice occupation for the winter, but this is a hoose that’s shut up in the winter, and I wad only hae to work it in the fine summer nichts.’
“‘Hoo dae ye dae the clammy hand, Peter?’ I asked him, and he jist winked.
“‘If I was tellin’ ye that,’ says he, ‘ye wad be as wise as mysel’. Never you mind, MacPherson; ask me nae questions and I’ll tell ye nae lees. Weel, as I was sayin’, I aye had a notion o’ a quate job at the coast. I couldna stand Gleska; there’s, such a rush aboot it, and sae mony stairs to sclim, and pianos aye playin’ next door. And the accent’s awfu’! Gie me a nice wee country hoose whaur somebody hanged himsel’, wi’ roses on the wa’, and dandelions in the front plot. But there’s plenty o’ us lookin’ efter jobs o’ that sort,—far ower mony; and it’s generally them wi’ influence that gets them at the hinder-end.’
“‘That’s whit everybody says aboot the situations here, Peter,’ says I. ‘If they’re nae use at their tred they talk a lot aboot influence. I’m thinkin’ ye wad soon get a job at the coast if ye were fit for’t.’
“He was the shortest-tempered ghost ever I seen. I had nae sooner said that than he gied anither skreich, and disappeared in a blue lowe wi’ an awfu’ smell o’ brimstone.
“‘Come oot o’ that!’ I says to him; ‘I can see the taps o’ yer gowfin’ stockings;’ and at that he gied a kind o’ shamed lauch and was sittin’ in the chair again, helpin’ himsel’ to anither dram.
“‘I’ll tell ye whit I’ll dae wi’ ye,’ said he. ‘I’ll no’ mind aboot Jeckson at a’, but I’ll hing aboot your hoose for a week or a fortnight, and they’ll never ken at the office. I canna think to gang into Jeckson’s hoose if he’s a teetotaler. Teetotalers is aye that—that—that teetotal. I wad never get sittin’ doon in Jeckson’s to a jovial gless like this.’
“‘Ye’re far ower jovial for me,’ says I. ‘See’s that decanter,’ and I took it frae him. ‘I’m awfu’ prood to see ye, but ye better be slidin’ afore her ladyship the wife comes in, or she’ll put the hems on ye. She canna stand ghosts.’