But to return to his interview with Mrs. Mercer--"I'm telt, Mrs. Mercer," he said, "that the Sergeant is awfu' ill wi' a smittal fivver, and that he needs some nurse--that is, as I understan', some ane that wad watch him day and nicht, and keep their een open like a whitrat; somebody that wadna heed haein' muckle tae do, and that could haud a guid but freen'ly grip o' Mr. Mercer gif his nerves rise. An' I hae been thinkin' ye'll fin't a bother tae get sic a bodie in Drumsylie--unless, maybe, ane that wad wark for a hantle o' siller; some decent woman like Luckie Craigie, wha micht--
"Dinna bother me the noo, Jock, wi' ony nonsense," said Katie, "I'm no fit for't. If ye need onything yersel', tell me what it is, and, if possible, I'll gie ye't. But I maun gang back tae the room."
"Ay," said Jock, "I want something frae ye, nae doot, and I houp I'll get it. I want an extraordinar' favour o' ye; for, as I was sayin', ye'll fin't ill tae get ony ane to watch Mr. Mercer. But if I get ane that doesna care for their life--that respecs and loes Adam--that wadna take a bawbee o' siller----"
"As for that o't, I'll pay them decently," interrupted Katie.
"And ane that," continued Jock, as if not interrupted, "has strength tae watch wi' leevin' man or woman,--what wad ye say tae sic a canny nurse as that?"
"If there's sic a bodie in the toon," replied Katie, "I wad be blythe tae try them; no' tae fix them, maybe, but to try, as the Doctor insists on't."
"Weel," said Jock, "the favour I hae to ax, altho' it's ower muckle maybe for you tae gie, is to let me try my han'--let me speak, and dinna lauch at me! I'm no' feered for death, as I hae been mony a time feered for life: I hae had by ordinar' experience watchin', ye ken, as a poacher, fisher, and a' that kin' o' thing, sin' I was a bairn; sae I can sleep wi' my een open; and I'm strong, for I hae thrashed keepers, and teylors, and a' sorts o' folk; fac', I was tempted tae gie a blue ee tae Smellie!--but let sleepin' dogs lie--I'll mak' a braw nurse for the gudeman."
Katie was taken so much aback by this speech as to let Jock go on without interruption; but she at last exclaimed--"Ye're a kind cratur, Jock, and I'm muckle obleeged to you; but I really canna think o't. It'll no' work; it wad pit ye aboot, an' mak' a cleish-me-claver in the toon; an'--an'----"
"I care as little for the toon," said Jock, "as the toon cares for me! Ye'll no be bothered wi' me, mind, gif ye let me help ye. I hae got clean pease strae for a bed frae Geordie Miller the carrier, and a sackfu' for a bowster; and I ken ye hae a sort o' laft, and I'll pit up there; and it's no' aften I hae sic a bed; and cauld parritch or cauld praties wull dae for my meat, an' I need nae mair; an' I hae braw thick stockin's--I can pit on twa pair if necessar', tae walk as quiet as a cat stealin' cream; sae gif ye'll let me, I'll do my best endeevour tae help ye."
"Oh, Jock, man!" said Mrs. Mercer, "ye're unco guid. I'll think o't--I'll think o't, and speer at the Doctor--I wull, indeed; and if sae be he needs--Whisht! What's that?" ejaculated Katie, starting from her chair, as little Mary entered the kitchen hurriedly, saying--