Turca ferox, Medo qui cinctus acinace gaudet,
Ad proceres regni plurima scripta dedit,
Pannoniæque petens perfricta fronte tributum,
Terruit innumeris tristia corda minis.
Quid facerent? ratio sic temporis ipsa ferebat,
Quamlibet inviti ut pacta tributa darent.
Nec mora, magnatum venerando ex ordine lectos
Verbetium mittunt Essetiumque pium;
Hosque jubent regni Turcis offerre tributa,
Flectere et immitis pectora dura Getæ.