Tempore concedens quo rex in fata Joannes
Liquerat Hungaricæ regia sceptra domus,
Inque patris titulos natus successerat infans
Et dubia imperii forma recentis erat,
Turca ferox, Medo qui cinctus acinace gaudet,
Ad proceres regni plurima scripta dedit,
Pannoniæque petens perfricta fronte tributum,
Terruit innumeris tristia corda minis.
Quid facerent? ratio sic temporis ipsa ferebat,
Quamlibet inviti ut pacta tributa darent.