[Y.B. Pasch. 1 Edw. II, pl. 4. f. 4.]
Trans.
Symon de Paris porta breve de transgression vers H. bailliffe sire Robert Tonny et plusours autres, et se pleint, qe W. et H. certein jour luy pristrent et emprisonerent etc. a tort encountre la pees etc. Pass respond pur toutz, forspris le bailliffe, qe riens nount fait encountre la pees, et pour le bailliff yl avowea le restreinement par la resoun qe lavantdit S. si est villeine lavandit R. qi bailliffe yl est, et fuist trove a N. en soun mes, le quel vint a lui tendist office de Provoist et il la refusa et ne se voilleit justicier etc. Tond. rehercea le avowery, et dit qe a cele avowery ne doit il estre resceve pur ceo qe S. est Fraunc Citizene de Londre, et ad este touz ceux diz anz, et ad este Vicounte le Roy en mesme la Citee, et rend accounts al Eschequer, et ceo voloms averrer par Record, et uncore huy ceo jour est Alderman et de la Ville de Londre, et demande jugement, sils puissent villenage en sa persone allegger. Herle. A ceo qil dient qil est citezen de Londre nous navoms qe faire, mes nous vous dioms, qil est villein R. de Eve et de Treve, et les Auncestres Ael et Besayel et toux ces Auncestres ses terres tennantz deinz le manoire de N. et ces Auncestres seisitz des villeins services des Auncestres S. come affaire Rechat de Char et de Sank et de fille marier, et de euz tailler haut et bas, etc., et uncore est seisi de ces freres de mesme le piere et de mesme la mere et demande Jugement si sour luy, come sour soun villein en soun mese trove, ne puisse avowere faire. Tond. Fraunc homme et de fraunc estat et eux nient seisi de luy, come de lour villein prest etc. Ber. Jeo ai oi dire qe un homme fuist prist en la bordel, et fuist prist et pendu, et sil eust demorre a lostiel, il neust en nul mal etc. auxient de ceste parte, sil eust este fraunc Citezen pur qe neust il demorre en la Citee? Ad alium diem; Tond. se tient qil ne fuist seisi de lui come de soun villein ne de ses villeins services etc. Pass. la ou il dit qe nous ne sumes pas seisis de lui come de nostre villein, il nasquit en nostre villeinage, ou commence nostre seisine, et nous lui trova mese en soun mes, et la nostre seisine continue, Jugement. Ber. Vous pledietz sour la seisine, et il pleident sour le droit issint naverrez james bon issue de plee. Herle. Seisi en la fourme qe nous avoms dit. Ber. La Court ne restreinera tiel travers sanz ceo qe vous dietz, que vous estez seisitz de lui come de vostre villein et de ses villeinz services, et sic fecit. Et alii e contra.
II.
[Y.B. Trin. 29 Edw. III, f. 41. I do not give a translation of this document because it has been explained with some detail in my text.]
Sur l'estatut de labourer.
Le servant suit par attorney, et le Master in propre persone. Que dit qe le servant fuit soun villein regardant al Manoire de C. et dit qil avoit mestre de ses services et de luy, pur qe nous luy prisoms come nostre viliein, come list a nous. Jugement si etc. tort in nostre party par tiel reteignement puit assigner. Et nota, qil fist protestacion, qil ne conust pas qil fuit in le service le plaintiffe etc. Et nota, qe le servant dit auxi, qil fuit le villein le Master qi plede, et dit qil fuit distreint, et auxi les amis pur luy tanqe qil convensist par cohercion venir a ses Seigneours. Burt. Le servant est par attorney, qe ne puit par soun ple faire sans Master villein. Purqe ceo ple ne gist in soun bouche. Et non allocatur par Wilb. qi dit qe le ple nest pas al breve: car mesqe il fuit icy in propre persone, et voillet conustre qil fuit villein ce nabat pas vostre breve (le quel qil fuit frank ou villein) si vous poies maintenir qil fuit in vostre service, si ce ne fuit par autiel mattier (come il ad plede) ou autre semblable. Et puis le servant weyva, et dit qil ne fist pas covenant etc. Et alii e contra. Et nota, qe l'opinion fuit, qe si villein fuit chace et distreint de venir a son Seignour propre, qe ce luy excusera del' penance del l'estatut. Sed Burt. negavit, eo qe ce vient de sa folie qil voilleit faire covenant dautre servir, qant il fuit appris qil fuit autry villein. Et ideo quere. Qant al' plea le Master Burt. challange ceo qil navoit pas alleger qil fuit seisi de luy come de soun villein. Et non allocator par Wilb. Qui dit, sil soit soun villein, soun plee est assez fort: car seisi et nient seisi ne fera pas issue.Op. Curiae. Et sic nota. Puis Burt. dit que l'on allege est quil est soun villein regardant a soun manoire de C. nous dioms qe mesme le manoire fuit in le seisin un A. que infeffa le defendant de mesme le manoire; et dioms qe tout le temps que il fuit allant et walkant a large a sa frank volunte come frankhome, sans ce qil fuit unque seisi de luy in son temps, et cety qe ad l'estat A. ne fuit unques seisi de luy, tanques ore qil de soun tort demesne luy pris hors de nostre service. Purque nous nentendons pas que par tiel cause il nous puit ouster de nostre accord. Finch. Et nous Jugement, depuis qil ne dedit pas qil nest nostre villein de nostre manoire de C. et le quel nous fuit seisis de luy devant, ou non, ou nostre feffor seisi, etc. ou ce ne puit my estre a purpose: car il alast alarge, purtant ne fuit il enfranchy. Purque etc. Th. Si vostre feffor ne fuit unques seisi de luy, coment qil vous dona le manoire, jeo di que ce de que il navoit pas le possession ne puit pas vestir in vous. Purque etc. Jer. Villeins regardants al' manoires sont de droit al' Seignour de prendre les a sa volunte, et sil face don le manoire a un autre, a quel heur que l'autre les happa, il est asses bon. Th. Sir, uncre mesque il soit issint entre luy et le grantor ou le villein, nous qe sums estrange ne serrons pas ly purtant: car si home qi soit estrange veigne in pais, et demurges par xx ou xxx ans, et nul home met debat sur luy, ne luy claime come seruant, il list a moy de prendre soun service, et de luy recevoir in mon service pur le terme solonque nostre covenaunt: et il nest pas reason qe jeo soy perdant, depuis qe in moy default ne puit etre ajuge, causa ut supra. Gr. Per mesme le reason qe vous luy purrets retenir tanque al' fine de terme, si poit un autre: et sic de singulis, et sic in infinitum: issint le Seignour ouste de soun villein a toujours, et ce ne seroit pas reason. Puis Th. n'osa pas demurrer; mes dit qil ne fuit pas soun villein de soun manoire de C. Prest etc. Fiff. Ceo n'est pas respons:Op. Curiae. car coment qil nest pas soun villein del' manoire, etc. sil fuit soun villein in gros, asses suffist. Et non allocatur pur ce quel avoit traverse soun respons in le manere come ce fuit livere, etc.
Common Pleas Roll (Record Office).