Taalkundig Magazijn. P. 1, No. 1.—p. 54.
Psalm LIV.
2. Gehori got gebet min, in ne furuuir bida mina; thenke te mi in gehori mi.
3. Gidruouit bin an tilogon minro, in mistrot bin fan stimmon fiundes, in fan arbeide sundiges.
4. Uuanda geneigedon an mi unreht, in an abulge unsuoti uuaron mi.
5. Herta min gidruouit ist an mi, in forta duodis fiel ouir mi.
6. Forthta in biuonga quamon ouer mi, in bethecoda mi thuisternussi.
7. In ic quad "uuie sal geuan mi fetheron also duuon, in ic fliugon sal, in raston sal."
8. Ecco! firroda ic fliende, inde bleif an eudi.
9. Ic sal beidan sin, thie behaldon mi deda fan luzzilheide geistis in fan geuuidere.