In principatu commutando civium
Nil, præter domini nomen, mutant pauperes.
Id esse verum parva hæc fabula indicat.
Asellum in prato timidus pascebat senex.
Is, hostium clamore subito territus,
Suadebat asino fugere, ne possent capi.
At ille lentus; quæso, num binas mihi
Clitellas impositurum victorem putas?
Senex negavit. Ergo quid refert mea
Cui serviam, clitellas dum portem meas?[[1020]]