No. 4.
Reply to the above. Dated 6 Sept. [1419.]
Id. Ibid.
Our most dred and most souveraign ertly lord we recomande us unto þe souveraign excellence of your kyngly mageste in þe most humble and lowely wyse þt any pouere or simple lieges can best imagine or devise lowely thankyng your souveraign excellence and noble grace of þe right gracious and right confortable lettres which ye liked late to sende us fro your town of Maunt be Johan Palyng. The which lettres with al maner of honour and lowely reverence we have mekly resceyved and understonde. And trewely most dred and souveraign lord gladder ne moor confortable tithinges might never have come nor in better tyme for to satisfie and refresche þe fervent desir of your poure lieges þat have loong thrusted aftur knowlech of your prosperite than were your sayd gracious lettres the which amongs al oþer special graces most principalich for our hertly confort conteyned þe souveraign helþ and parfit prosperite of your most souveraign and gracious persone. The which Crist of his souveraign mercy and noble pite plese alwey to kepe in al maner of worship and joye. Our most dred and souveraign erthly lord whan we remembre us hough þat your kyngly might and power grounded in the trewe pees of god is so vertuosly soonded wiþ þe spirit of meknesse in devout and continuel thankyng of god in al his soondes and trust of good prayers of your peple as your said lettres make gracious mencõn: Trewely we ar meved be as gret consideracõn and as resonable cause as ever were liege men to pray as we have and shulle yet god will for þe good and gracious spede of your most excellent and gracious persone and to thanke god lowely þat ever he sent us so gracious and so vertuose a souveraign lord to regne and have lordship up on us. Our most dred and most souveraign lord yef it like your souveraign highnesse to here of þastat of your citee London plese it your kyngly mageste to conceyve þat in more quiet ne pesibler rest as ferforth as absence of you þat ar our most gracious and most souveraign lord may suffre was never erthly citee nor place blessed be god. Our most dred and most souveraign lord we lowely beseche god the kyng of pees whos grace excedeth þe merit of hem þat pray þat he vouche sauf your kyngly mageste stabilissh in al vertu and evermore kepe your most excellent and souveraign persone in al joy and prosperite to his plesaunce. Writen at your said citee of London under þe seal of mairalte þerof the vie day of September.
No. 5.
Letter from the Duke of Clarence to the Mayor and Aldermen of London notifying the capture of Pontoise. Dated Mantes, 5 Aug. [1419]
Letter Book I, fo. 236b.
Right trusty and Welbeloved We grete you well often tymes with al our herte. And forasmoche as it is confortable and likyng to you to here of þe tithinges in this parties. We do you to understonde þat the morwe after þat the werre began at this tyme by twene my lord þe kyng and his adversaire of Fraunce by cause þat he wolde naught applie nor accorde to right and resoun he assigned certein peple to passe to Pountoise Where the Frensh kyng lay during the time of this convencõn. And so thei have wonne the forsaid toun by assaulte ithonked be god thorough the whiche wynninge my forsaid lord hath passage to Parys. Ferthermore We do you to understonde that Roger Tillyngton, Skynnere, our welbeloved servaunt desurth gretly to be freman and enfranchised amongs you at þis tyme. Wherefor We pray you entierly With al our herte þat ye wol for contemplacõn and favour of us to admitte and resceyve the forsayd Roger to be enfraunchised amongs you so þat he may knowe þat þis our praier may availle hym and stonde in stede as our gret trust is in you Right trusty and Welbeloved þe Holy Trinite have you evermore in his kepyng I writen at Maunt Under our Signet the v day of Augst.
No. 6.
Reply to the above. Dated 6 Sept. [1419]