Praeterea, magnae legiones quom loca cursu
Camporum complent, belli simulacra cientes,
Fulgur ibi ad cœlum se tollit, totaque circum
Aere renidescit tellus, subterque virum vi
Excitur pedibus sonitus, clamoreque montes
Icti rejectant voces ad sidera mundi;
Et circumvolitant equites, mediosque repente
Tramittunt, valido quatientes impete, campos;
Et tamen est quidam locus altis montibus, unde
Stare videntur, et in campis consistere fulgur.