Of the Palays of the Kyng of the Yle of Java. Of the Trees, that beren Mele, Hony, Wyn and Venym; and of othere Mervayilles and Customes, used in the Yles marchinge thereabouten.

[Sidenote: Cap. XVIII.] Besyde that yle that I have spoken of, there is another yle, that is clept Sumobor, that is a gret yle: and the kyng thereof is righte myghty. The folk of that yle maken hem alweys to ben marked in the visage with an hote yren, bothe men and wommen, for gret noblesse, for to ben knowen from other folk. For thei holden hem self most noble and most worthi of alle the world. And thei han werre alle weys with the folk that gon alle naked. And faste besyde is another yle, that is clept Betemga, that is a gode yle and a plentyfous. And many other yles ben there about; where ther ben many of dyverse folk: of the whiche it were to longe to speke of alle.

But fast besyde that yle, for to passe be see, is a gret yle a gret contree, that men clepen Java: and it is nyghe 2000 myle in circuyt. And the kyng of that contree is a fulle gret lord and a ryche and a myghty, and hathe undre him 7 other kynges of 7 other yles abouten hym. This yle is fulle wel inhabyted, and fulle wel manned. There growen alle maner of spicerie, more plentyfous liche than in ony other contree; as of gyngevere, clowegylofres, canelle, zedewalle, notemuges and maces. And wytethe wel, that the notemuge berethe the maces. For righte as the note of the haselle hathe an husk with outen, that the note is closed in, til it be ripe, and aftre fallethe out; righte so it is of the notemuge and of the maces. Manye other spices and many other godes growen in that yle. For of alle thing is there plenty, saf only of wyn: but there is gold and silver gret plentee. And the kyng of that contree hathe a paleys fulle noble and fulle marveyllous, and more riche than ony in the world. For alle the degrez to gon up into halles and chambres, ben on of gold, another of sylver. And also the pavmentes of halles and chambres ben alle square, on of gold and another of sylver: and alle the walles with inne ben covered with gold and sylver, in fyn plates: and in tho plates ben stories and batayles of knyghtes enleved. And the crounes and the cercles abouten here hedes ben made of precious stones and riche perles and grete. And the halles and the chambres of the palays ben alle covered with inne with gold and sylver: so that no man wolde trowe the richesse of that palays, but he had seen it. And witethe wel, that the kyng of that yle is so myghty, that he hathe many tymes overcomen the grete Cane of Cathay in bataylle, that is the most gret emperour that is undre the firmament, outher bezonde the see or on this half. For thei han had often tyme werre betwene hem, be cause that the grete cane wolde constreynen him to holden his lond of him: but that other at alle tymes defendethe him wel azenst him.

Aftre that yle, in goynge be see, men fynden another yle, gode and gret, that men clepen Pathen, that is a gret kyngdom, fulle of faire cytees and fulle of townes. In that lond growen trees, that beren mele, wherof men maken gode bred and white, and of gode savour; and it semethe as it were of whete, but it is not allynges of suche savour. And there ben other trees, that beren hony, gode and swete: and other trees, that beren venym; azenst the whiche there is no medicyne but on; and that is to taken here propre leves, and stampe hem and tempere hem with watre, and then drynke it: and elle he schalle dye; for triacle will not avaylle, ne non other medicyne. Of this venym, the Jewes had let seche of on of here frendes, for to empoysone alle Cristiantee, as I have herd hem seye in here confessioun, before here dyenge. But thanked be alle myghty God, thei fayleden of hire purpos: but alle weys thei maken gret mortalitee of people. And other trees there ben also, that beren wyn of noble sentement. And zif zou like to here how the mele comethe out of the trees, I shalle seye zou. Men hewen the trees with an hatchet, alle aboute the fote of the tree, tille that the bark be parted in many parties; and than comethe out ther of a thikke lykour, the whiche thei resceyven in vesselles, and dryen it at the hete of the sonne; and than thei han it to a mylle to grynde; and it becomethe faire mele and white. And the hony and the wyn and the venym ben drawen out of other trees, in the same manere, and put in veselles for to kepe. In that yle is a ded see, that is a lake, that hathe no ground. And zif ony thing falle in to that lake, it schalle nevere comen up azen. In that lake growen redes, that ben cannes, that thei clepen thaby, that ben 30 fadme long. And of theise canes men maken faire houses. And ther ben other canes, that ben not so longe, that growen neer the lond, and han so longe rotes, that duren wel a 4 quartres of a furlong or more; and at the knottes of tho rotes, men fynden precious stones, that han gret vertues: and he that berethe ony of hem upon him, yren ne steel ne may not hurt him, ne drawe no blood upon him: and therfore thei that han tho stones upon hem, fighten fulle hardyly, bothe on see and lond: for men may not harmen hem on no partye. And therfore thei that knowen the manere, and schulle fighten with hem, thei schoten to hem arwes and quarrelles with outen yren or steel; and so thei hurten hem and sleen hem. And also of tho cannes, thei maken houses and schippes and other thinges; as wee han here, makynge houses and schippes of oke or of ony other trees. And deme no man, that I seye it, but for a truffulle: for I have seen of the cannes with myn owne eyzen fulle many tymes lyggynge upon the ryvere of that lake: of the whiche, 20 of oure felowes ne myghten not liften up ne beren on to the erthe.

Aftre this yle, men gon be see to another yle, that is clept Calonak: and it is a fair lond and a plentifous of godes. And the kyng of that contrey hath als many wyfes as he wole; for he makethe serche alle the contree, to geten him the fairest maydens that may ben founde, and makethe hem to ben broughte before him; and he takethe on o nyght, and another another nyght, and so forthe contynuelle sewyng; so that he hath a 1000 wyfes or mo. And he liggethe never but o nyght with on of hem, and another nyght with another, but zif that on happene to ben more lusty to his plesance than another. And therfore the kyng getethe fully many children; sum tyme an 100, sum tyme an 200, and sum tyme mo. And he hathe also into a 14000 olifauntz or mo, that he makethe for to ben brought up amonges his vileynes, be alle his townes. For in cas that he had ony werre azenst any other kyng aboute him, thanne he makethe certeyn men of armes for to gon up in to the castelles of tree, made for the werre, that craftily ben sett up on the olifantes bakkes, for to fyghten azen hire enemyes: and so don other kynges there aboute. For the maner of werre is not there, as it is here or in other contrees; ne the ordinance of werre nouther. And men clepen the olifantes, warkes.

And in that yle there is a gret marvayle, more to speke of than in ony other partie of the world. For alle manere of fissches, that ben there in the see abouten hem, comen ones in the zeer, eche manere of dyverse fissches, on maner of kynde aftre other; and thei casten hem self to the see banke of that yle, so gret plentee and multitude, that no man may unnethe see but fissche; and there thei abyden 3 dayes: and every man of the contree takethe of hem, als many as him lykethe: And aftre, that maner of fissche, after the thridde day, departethe and gothe into the see. And aftre hem, comen another multitude of fyssche of another kynde, and don in the same maner as the firste diden other 3 dayes. And aftre hem, another; tille alle the dyverse maner of fissches han ben there, and that men han taken of hem, that hem lykethe. And no man knowethe the cause wherfore it may ben. But thei of the contree seyn, that it is for to do reverence to here kyng, that is the most worthi kyng, that is in the world, as thei seyn; because that he fulfillethe the comandement, that God bad to Adam and Eve, whan God seyde, Crescite et multplicamini et replete terram. And for because that he multipliethe so the world with children, therfore God sendethe him so the fissches of dyverse kyndes, of alle that ben in the see, to taken at his wille, for him and alle his peple. And therfore alle the fissches of the see comen, to maken him homage, as the most noble and excellent kyng of the world, and that is best beloved with God, als thei seyn. I knowe not the resoun, whi it is; but God knowethe. But this, me semethe, is the moste marveylle, that evere I saughe. For this mervaylle is azenst kynde, and not with kynde, that the fissches, that han fredom to enviroun alle the costes of the see, at here owne list, comen of hire owne wille to profren hem to the dethe, with outen constreynynge of man: and therfore I am syker, that this may not ben, with outen a gret tokene.

There ben also in that contree a kynde of snayles, that ben so grete, that many persones may loggen hem in here schelles, as men wolde done in a litylle hous. And other snayles there ben, that ben fulle grete, but not so huge as the other. And of theise snayles, and of gret white wormes, that han blake hedes, that ben als grete as a mannes thighe, and somme lesse, as grete wormes that men fynden there in wodes, men maken vyaunde rialle, for the kyng and for other grete lordes. And zif a man, that is maryed, dye in that contree, men buryen his wif with him all quyk. For men seyn there, that it is resoun, that sche make him companye in that other world, as sche did in this.

CAPVT. 30.

De Regnis Cynocephalorum, et alijs Insulis.

Per mare oceanum potest hinc veniri in Insulam Kaffa: [Marginal note: Vel Caffeles.] quicunque ibi infirmari videtur ad mortem, suspenditur ad arborem, antequam moriatur, vt non ab immundis terræ vermibus, sed a coeli auibus, quas reputant Dei Angelos, comedatur.