There, lanely, by the ingle-cheek,
I sat and ey’d the spewing reek,
That fill’d, wi’ hoast-provoking smeek,
The auld clay biggin’;
An’ heard the restless rattons squeak
About the riggin’.
All in this mottie, misty clime,
I backward mused on wastet time,
How I had spent my youthfu’ prime,
An’ done nae thing,
But stringin’ blethers up in rhyme,
For fools to sing.
Had I to guid advice but harkit,
I might, by this hae led a market,
Or strutted in a bank an’ clarkit
My cash-account:
While here, half-mad, half-fed, half-sarkit,
Is a’ th’ amount.
I started, mutt’ring, blockhead! coof!
And heav’d on high my waukit loof,
To swear by a’ yon starry roof,
Or some rash aith,
That I, henceforth, would be rhyme-proof
Till my last breath—
When, click! the string the snick did draw:
And, jee! the door gaed to the wa’;
An’ by my ingle-lowe I saw,
Now bleezin’ bright,
A tight outlandish hizzie, braw
Come full in sight.
Ye need na doubt, I held my wisht;
The infant aith, half-form’d, was crusht;
I glowr’d as eerie’s I’d been dusht
In some wild glen;
When sweet, like modest worth, she blusht,
And stepped ben.
Green, slender, leaf-clad holly-boughs
Were twisted, gracefu’, round her brows,
I took her for some Scottish Muse,
By that same token;
An’ come to stop those reckless vows,
Wou’d soon be broken.
A “hair-brain’d, sentimental trace”
Was strongly marked in her face;
A wildly-witty, rustic grace
Shone full upon her:
Her eye, ev’n turn’d on empty space,
Beam’d keen with honour.
Down flow’d her robe, a tartan sheen,
’Till half a leg was scrimply seen:
And such a leg! my bonnie Jean
Could only peer it;
Sae straught, sae taper, tight, and clean,
Nane else came near it.