L—To MR. WILLIAM NICOL, CLASSICAL MASTER, HIGH SCHOOL, EDINBURGH.
CARLISLE,
June
1, 1787.
KIND, HONEST-HEARTED WILLIE.—I'm sitten down here, after seven-and-forty miles' ridin', e'en as forjesket and forniaw'd as a forfoughten cock, to gie ye some notion o' my land lowper-like stravaguin sin the sorrowfu' hour that I sheuk hands and parted wi' auld Reekie.
My auld, ga'd gleyde o' a meere has huchyall'd up hill and down brae, in Scotland and England, as teugh and birnie as a very deil wi' me. It's true, she's as poor's a sang-maker and as hard's a kirk, and tipper-taipers when she taks the gate, first like a lady's gentlewoman in a minuwae, or a hen on a het girdle; but she's a yauld, poutherie Girran for a' that, and has a stomack like Willie Stalker's meere that wad hae disgeested tumbler-wheels, for she'll whip me aff her five stimparts o' the best aits at a down-sittin and ne'er fash her thumb. When ance her ring-banes and spavies, her crucks and cramps, are fairly soupl'd, she beets to, beets to, and aye the hindmost hour the tightest. I could wager her price to a thretty pennies, that for twa or three wooks ridin' at fifty miles a day, the deil-stickit a five gallopers acqueesh Clyde and Whithorn could cast saut on her tail.
I hae dander'd owre a' the kintra frae Dunbar to Selcraig, and hae forgather'd wi' mony a guid fallow, and mony a weelfar'd hizzie. I met wi' twa dink quines in particlar, ane o' them a sonsie, fine, fodgel lass, baith braw and bonnie; the tither was a clean-shankit, straught, tight, weel-far'd winch, as blythe's a lintwhite on a flowerie thorn, and as sweet and modest's a new blawn plumrose in a hazle shaw. They were baith bred to mainers by the beuk, and onie ane o' them had as muckle smeddum and rumblegumtion as the half o' some presbyteries that you and I baith ken.
I was gaun to write ye a lang pystle, but, Gude forgie me, I gat mysel sae notouriously fou the day after kail-time that I can hardly stoiter but and ben.
My best respecks to the guidwife and a' our common friens, especiall Mr. and Mrs. Cruikshank, and the honest guidman o' Jock's Lodge.[37]