It’s here our Merren lang has lain,
A wee bewast the table-stane;
An’ yon’s the grave o’ Sandy Blane;
An’ further ower,
The mither’s brithers, dacent men!
Lie a’ the fower.
Here the guidman sall bide awee
To dwall amang the deid; to see
Auld faces clear in fancy’s e’e;
Belike to hear
Auld voices fa’in saft an’ slee
On fancy’s ear.
Thus, on the day o’ solemn things,
The bell that in the steeple swings
To fauld a scaittered faim’ly rings
Its walcome screed;
An’ just a wee thing nearer brings
The quick an’ deid.
But noo the bell is ringin’ in;
To tak their places, folk begin;
The minister himsel’ will shüne
Be up the gate,
Filled fu’ wi’ clavers about sin
An’ man’s estate.
The tünes are up—French, to be shüre,
The faithfü’ French, an’ twa-three mair;
The auld prezentor, hoastin’ sair,
Wales out the portions,
An’ yirks the tüne into the air
Wi’ queer contortions.
Follows the prayer, the readin’ next,
An’ than the fisslin’ for the text—
The twa-three last to find it, vext
But kind o’ proud;
An’ than the peppermints are raxed,
An’ southernwood.
For noo’s the time whan pews are seen
Nid-noddin’ like a mandareen;
When tenty mithers stap a preen
In sleepin’ weans;
An’ nearly half the parochine
Forget their pains.
There’s just a waukrif’ twa or three:
Thrawn commentautors sweer to ’gree,
Weans glowrin’ at the bumlin’ bee
On windie-glasses,
Or lads that tak a keek a-glee
At sonsie lasses.
Himsel’, meanwhile, frae whaur he cocks
An’ bobs belaw the soundin’-box,
The treesures of his words unlocks
Wi’ prodigality,
An’ deals some unco dingin’ knocks
To infidality.
Wi’ sappy unction, hoo he burkes
The hopes o’ men that trust in works,
Expounds the fau’ts o’ ither kirks,
An’ shaws the best o’ them
No muckle better than mere Turks,
When a’s confessed o’ them.