“But your father didna like him?”
“Dinna put it that way, Jeanie. He liked him but he saw a faut in him that spoiled a’. I was wilfu. I said Willie would gie up the company he keepit when he was merrit, and that it was guid-fellowship and no love o’ the drink that enticed him. I dinna say that I regret what I did, or that my lot hasna been as guid as I deserved—God forgive me that I should repine or say an unkindly word o’ him that lies there—but young folks dinna lippen to their parents in choosing partners as they ocht.”
“Hoots, mother; when a lad or lass hae found their heart’s love, what for suld father or mother interfere?”
“Easy said, Jeanie, but think ye there is ony body in the wide world loes son or dochter as a parent does? They are as the apple o’ their ee, and his or her happiness is all they seek. Dootless there are warld’s worms o’ parents who only look to the suitor’s gear and wad break off the truest love-match that ever was gin he were puir. I dinna speak o’ them, for they are out o’ the question. But take parents by ordinar, who only seek their bairns’ welfare, and the son or dochter wha disregards their advice in choosing a life-mate will hae mickle to repent o’.”
“I dinna see hoo that is,” said Jeanie, “for surely their marriage concerns only themselves?”
“True in a sense, Jeanie, that as we mak oor bed we maun lie on’t. Think ye, though, o’ a parent’s experience, that nae glamor o’ love blinds their ee, that their haill concern is for their bairn’s happiness, and they may see fauts in the would-be partner o’ their child that can only result in meesery. Young folks shouldna think their parents are obstinate or stupid when they oppose their marrying this ane or that ane. In maist cases they hae solid reason for their opposition, and the son is foolish that winna get his parents consent before he gangs too far and the dochter silly indeed who says Yes without taking counsel o’ her mother.”
“Oh, but that wadna dae always,” replied Jeanie, deprecatingly, in a tone as if such a course would rob love of its romance.
“Come, noo, Jeanie, tell me what better adviser can a dochter hae than her mother, and hasna the father a richt to hae some say in a match seeing that, if it disna turn out weel, he may hae a useless son-in-law to sorn on him or, in his auld days, hae his dochter or a tawpy of a son’s wife come wi’ a wheen bairns to seek shelter in his hame? Na, na, the first commandment wi’ promise requires obedience in this as in ither callings o’ life, and happy is the wedding whaur the true love o’ the young couple is crooned wi’ the blessings (given without a misgiving) o’ their parents, for there is, then, a reasonable prospect that the match will prove what a’ should be—a heaven upon earth.”
“Mightna the parents be mistaen, mother?”