"That shook him off the scent, though, for a minute, I was feared that he saw through me, for he said: 'Now, Hector, ye talk like a damned hedge-lawyer. There were four soldiers involved. As far as Sir Thomas can make out, the number of their assailants was six or eight, and the attack took place on the road about a mile and a half from New Abbey. After being knocked senseless, the soldiers were carried into a wood and tied to a tree. They werena found till next day.'
"Now I knew where we stood. Dalzell and Lag had got the scent a' wrang. It wasna for me to gi'e the scent richt. So it didna cost me ony scruples o' conscience to make replies to the facts that he had laid before me. 'Sir Robert,' says I, 'the case baffles me a' thegither. I maun ha'e been very near the wood ye speak o' at the time this attack was made upon the troopers, but I saw nae sodgers on the road, nor did I come across ony six or eight men wha micht ha'e assailed them. As a matter o' fact I met naebody between Loch End and New Abbey, except a puir auld body gatherin' a wheen sticks.' And then an idea occurred to me--for I knew that if Lag or Dalzell couldna lay their hands upon the men wha had attacked the troopers, they would start harryin' every hoose, where there was a likely young man, between Loch End and New Abbey. That would only mean persecution for innocent folk; so, though I was fain enough to save my ane skin and yours, I didna' want others to be punished for oor deeds, and I threw oot a suggestion at which Lag jumped. 'It's only a theory o' mine, Sir Robert,' I said, 'but it's juist possible that this assault on the sodgers was made by the sailors frae some smugglin' craft that micht be lyin' in the Solway ayont New Abbey.'
"'Man, Hector,' he said, 'that's worth thinkin' o'. There was a smuggler reported in the estuary a few days syne. I maun look into that.'
"And then the pain in his feet began to get bad, and he cursed horribly. When he got his breath again, he looked at me and said:
"'And now, Hector, a word in your lug. You're supposed to be a guid King's man, and I have no direct evidence that you are not; but it's a queer thing that when you drop a hint to the King's representatives aboot some hill-man's nest and the troopers gang to harry it, there are nae eggs in it'; and he glowered at me savagely. 'Have a care,' he growled, 'have a care!'
"I thocht it was time to change the subject, and lookin' doon frae his face to his bandaged feet I said: 'I would coont it a high honour if ye wad permit me to try some o' my magical salve on your feet. I can assure ye, sir, it has powers o' a high order; it's used in the Court o' His Majesty the King himsel'.' Wi' that I produced a wee pot o' it oot o' my pocket. 'It will,' I said, 'produce instant relief and ensure for ye a guid nicht's rest. May I ha'e the honour o' tryin' it, sir?'
"'Well,' says Lag, 'I'm ready to try anything. Nobody but mysel' kens the torment I have been suffering. It's fair damnable.'
"Withoot anither word I dropped down on my knees beside him and took off the cauld water bandages wi' as much gentleness as I could; and when they were off and I saw his feet, I kent hoo he maun ha'e suffered. They were the colour o' half-ripe plums and that swollen that if ye put yer finger on them ye left a dint as though they had been clay. I said to mysel', says I, 'Hector, here's a test for yer salve,' so I talked to Lag cheerily o' the wonderfu' cures I had made afore, and a' the while, as gently as I could, I was rubbin' his feet wi' it. When I had been rubbin' for the better pairt o' half an 'oor, he said: 'Man, Hector, ye're nae fule. Ye've gi'en me greater ease than I've had a' day. Did ye say ye made this saw yoursel'?' I told him it was my ain discovery and that nane but me could supply it, but if he would dae me the honour o' acceptin' a pot or twa, he would mak' me a prood man. Then I bandaged his feet and washed my hands.
"'That's fine,' he said. 'Now, Hector, one good turn deserves another,' and taking up a wee bell that stood on a table beside him he rang it, and his body-servant came back into the room. 'Bring a couple o' bottles o' Malvoisie,' he ordered. 'And at the same time fetch that soldier of Sir Thomas Dalzell's wha brought the message this morning.'
"'In a few minutes back came the servant wi' a couple o' bottles in his hand and behind him a trooper wi' a bandage roond his heid. I recognised him at aince. He was the fourth that we laid oot in the wood. When I saw him I maun say I got an awfu' fricht; for if ye mind he was the ane that had a chance o' seein' you and me. I thocht tae masel'--Noo, Hector, ye're in a bonnie hole, but neither by act or word did I let on that I was perturbed, and I waited for what should happen next. Lag ordered his man to open ane o' the bottles. Then he poured oot a glass for me and anither for himsel', and turnin' to Dalzell's man, he said: