"Weel, mither, the way o' it was this. We had only a half-day yesterday at the schule," he began, "for the maister was gaun to a funeral; an' when I cam' oot at denner-time I saw Airchie Marchbanks, an' he said that his faither was gaun up the lochside veesitin', that he was gaun, too, an' if I likit I could hing on ahint. So I hid my buiks aneath a stane—"
"Ye destructionfu' vagabond, I'll get yer faither to gie ye a guid—"
"But, mither, it was a big braid stane. They're better there than cadgin' them hame an' maybe lossin' them. An' my faither promised that there was to be nae lickin' if I telt the truth."
"Weel, never mind the buiks," said I, for this had nothing to do with the minister's letter. "Gae on wi' your story."
"The minister startit aboot twa o'clock wi' the auld meer in the shafts, Airchie on the front seat aside his faither, an' me sittin' on the step ahint."
"Did the minister ken ye war there?" asked his mother.
"Nae fears!" said Alexander M'Quhirr the younger, unabashed. It is a constant wonder to his mother whom he takes after. But it is no great wonder to me. It had been indeed a greater wonderment to me that Alec should so readily promise to accompany the minister; for whenever either a policeman or a minister is seen within miles of Drumquhat, my lad takes the shortest cut for the fastnesses of Drumquhat Bank, there to lie like one of his hunted forebears of the persecution, till the clear buttons or the black coat have been carefully watched off the premises.
"The first place where the minister gaed," continued my son, "was the clauchan o' Milnthird. He was gaun to see Leezie Scott, her that has been ill sae lang. He gaed in there an' bade a gey while, wi' Airchie haudin' ae side o' the horse's heid an' me the ither—no' that auld Jess wad hae run away if ye had tied a kettle to her tail—"
"Be mair circumspect in yer talk," said his mother; "mind it's a minister's horse!"
"Weel, onyway, I could see through the wundy, an' the lassie was haudin' the minister's haun', an' him speakin' an' lookin' up at somebody that I didna see, but maybe the lassie did, for she lay back in her bed awfu' thankfu'-like. But her mither never thankit the minister ava', juist turned her back an' grat into her peenie. Mr. Marchbanks cam' oot; but I saw nae mair, for I had to turn an' rin, or he wad hae seen me, an' maybe askit me to hae a ride!"