"But nae man ever saw Muckle Alick angry. The ill-set callants o' the Clearin' Hoose tries whiles to provoke him. Alick, he says little—only looks at them like a big sleepy dog when the pups are yelping. Then after a while he says, 'Ye are like Tam Purdy's cat, when it ate the herrin' he had for his breakfast the time he was askin' the blessin', ye are "gettin' raither pet!"'
"And then, if they winna take a telling, Alick will grip them in his loofs, gie them a shake and a daud thegither as if he was knockin' the stour aff a couple o' books, syne stick their heads in a couple o' bags o' Indian meal, an' leave them wi' their heels in the air. But Alick is never oot o' temper. And ceevil—fresh kirned butter is no sweeter at eighteenpence a pund!"
ADVENTURE XXIX.
MUCKLE ALICK'S BANNOCKBURN.
"But what was I gaun to tell ye? Oh, aboot the Irish drovers. Ye maun ken they are no a very weel-liked class doon aboot Netherby. For they come in squads to the Market Hill on Mondays, and whiles their tongues and their sticks are no canny. Though some, I'm no denyin', are ceevil chiels. But them that I'm gaun to tell ye aboot were no that kind.
"It was the middle o' the day and Alick was away for his denner. There had been a bad market that day. Baith the marts were through hours afore their usual. So the drovers swarmed up to the station to get the afternoon train for Port Andrew. And on the platform the drinkin' frae bottles an' the swearin' was fair extraordinar'! So I am telled. Then, when the train cam' in, there was eight or nine o' the warst o' them that wadna be served but they maun a' get into a first-class compartment. And oot o' that they wadna get!
"The station-maister was a young man then and newly gotten on. He thocht a heap o' himsel'—as a young station-maister aye does when he first gets on the stemmed bonnet, and comes oot frae the office like Lord Almichty wi' a pen ahint his lug.
"Weel, at ony rate, the Netherby station-maister was that kind. An' he was determined that naebody should cross him in his ain station.
"'I'll juist lock them in and let them fecht it oot,' said the guard, 'and by the time we are through the big cutting at the Stroan they'll hae shuggled doon as quaite as a session.'
"It was doubtless good advice. But the station-maister was mainly angered. He gaed to the door o' the compartment and threatened the drovers wi' the law. And they juist pelted him wi' auld sodjers and ill talk. Then he cried for a' the porters and clerks, till there was a knot o' ten or a dozen o' them aboot the door—and a' the folk in the train wi' their heads oot o' the windows, askin' what on earth (an' ither places) was keepin' the train. And doon the main line the express was fair whustling blue-fire and vengeance because the signals were against her. But nae farther could they get. The station-maister he was determined to hae the drovers oot. And they were as set no to come—being gye and weel filled wi' the weedow's cheapest market whusky that she keepit special for the drovers, for faith it wad hae scunnert a decent Heelant sow! I tried it yince and was I the waur o't for a fortnicht. But ony whusky is guid enough for an Irishman, if only ye stir plenty o' soot amang it! They think they're hame again if they get that.