Tandem dolori plus satis est datum,
Exsurge fortis, nunc animis opus,
Te, docta, Laurenti, vetustas,
Te medici revocant labores.
Permitte summo quicquid habes patri,
Permitte fidens; et muliebribus,
Amice, majorem querelis
Redde tuis, tibi redde, mentem.
IN THEATRO, MARCH 8, 1771.
Tertii verso quater orbe lustri,
Quid theatrales tibi, Crispe, pompae?
Quam decet canos male litteratos
Sera voluptas!
Tene mulceri fidibus canoris?
Tene cantorum modulis stupere?
Tene per pictas, oculo elegante,
Currere formas?
Inter aequales, sine felle liber,
Codices, veri studiosus, inter
Rectius vives. Sua quisque carpat
Gaudia gratus.
Lusibus gaudet puer otiosis,
Luxus oblectat juvenem theatri,
At seni fluxo sapienter uti
Tempore restat.
INSULA KENNETHI, INTER HEBRIDAS.
Parva quidem regio, sed religione priorum
Clara, Caledonias panditur inter aquas.
Voce ubi Cennethus populos domuisse feroces
Dicitur, et vanos dedocuisse deos.
Huc ego delatus placido per caerulea cursu,
Scire locus volui quid daret iste novi.
Illic Leniades humili regnabat in aula,
Leniades, magnis nobilitatus avis.
Una duas cepit casa cum genitore puellas,
Quas amor undarum crederet esse deas.
Nec tamen inculti gelidis latuere sub antris,
Accola Danubii qualia saevus habet.
Mollia non desunt vacuae solatia vitae,
Sive libros poscant otia, sive lyram.
Fulserat ilia dies, legis qua docta supernae
Spes hominum et curas gens procul esse jubet.
Ut precibus justas avertat numinis iras,
Et summi accendat pectus amore boni.
Ponte inter strepitus non sacri munera cultus
Cessarunt, pietas hic quoque cura fuit:
Nil opus est aeris sacra de turre sonantis
Admonitu, ipsa suas nunciat hora vices.
Quid, quod sacrifici versavit foemina libros.
Sint pro legitimis pura labella sacris—
Quo vagor ulterius? quod ubique requiritur hic est;
Hic secura quies, hic et honestus amor.