MORTREWS OF FYSSH. XX.VI. V.
Take codlyng, haddok, oþ hake and lynours with the rawnes [1] and seeþ it wel in water. pyke out þe bones, grynde smale the Fysshe, drawe a lyour of almaundes & brede with the self broth. and do the Fysshe grounden þerto. and seeþ it and do þerto powdour fort, safroun and salt, and make it stondyng.
[1] rawnes. roes.
LAUMPREYS IN GALYNTYNE. XX.VI. VI.
Take Laumpreys and sle [1] hem with vynegur oþer with white wyne & salt, scalde hem in water. slyt hem a litel at þer nauel…. & rest a litel at the nauel. take out the guttes at the ende. kepe wele the blode. put the Laumprey on a spyt. roost hym & kepe wel the grece. grynde raysouns of coraunce. hym up [2] with vyneger. wyne. and crustes of brede. do þerto powdour of gyngur. of galyngale [3]. flour of canel. powdour of clowes, and do þerto raisouns of coraunce hoole. with þe blode & þe grece. seeþ it & salt it, boile it not to stondyng, take up the Laumprey do hym in a chargeour [4], & lay þe sewe onoward, & serue hym forth.
[1] sle. slay, kill. [2] hym up. A word seems omitted; drawe or lye. [3] of galyngale, i. e. powder. V. No. 101. [4] Chargeour. charger or dish. V. No. 127.
LAUMPROUNS IN GALYNTYNE. XX.VI. VII.
Take Lamprouns and scalde hem. seeþ hem, meng powdour galyngale and some of the broth togyder & boile it & do þerto powdour of gyngur & salt. take the Laumprouns & boile hem & lay hem in dysshes. & lay the sewe above. & serue fort.
LOSEYNS [1] IN FYSSH DAY. XX.VI. VIII.
Take Almandes unblaunched and waisthe hem clene, drawe hem up with water. seeþ þe mylke & alye it up with loseyns. cast þerto safroun. sugur. & salt & messe it forth with colyandre in confyt rede, & serue it forth.