APPENDIX B.
BOTANICAL DESCRIPTIONS OF THE GENUS CHINCHONA, AND OF THE SPECIES OF CHINCHONÆ NOW GROWING IN INDIA AND CEYLON.
From Weddell, Howard's Pavon, Spruce, and Karsten.
CHINCHONA.
(From Weddell's 'Histoire Naturelle des Quinquinas,' p. 17.)
Calyx tubo turbinato, cum ovario connato, pubescente; limbo supero, 5-dentato, persistente; dentibus in præfloratione valvatis.
Corolla hypocrateriformis, tubo tereti vel subpentagono, in angulis baseos nonnunquam fisso, intus glabro vel rarissime pilosiusculo; limbo 5-fido: laciniis lanceolatis, intus glabris, margine piloso-barbatis (pilis claviformibus lanatis) extus tuboque pubescentibus, æstivatione valvatis, explicatis patulo-recurvis.
Stamina 5, corollæ laciniis alterna, glabra; filamentis inferno tubo insertis, adnatis; antheris linearibus, inclusis vel apice subexsertis, bilocularibus, introrsis, imo dorso affixis.
Ovarium disco carnoso, pulviniformi, obsolete 5-vel 10-tuberculato coronatum.
Ovula numerosa, in placentis linearibus dissepimento utrinque affixis peltata, imbricata, anatropa.
Stylus simplex, glaber, stigma bifidum, in tubo corollino latens vel subexsertum.
Capsula ovata oblonga vel lineari-lanceolata, utrinque sulcata, limbo calycis coronata, lævis vel obscure costata, glabra pubescensve, bilocularis, polysperma, septicide a basi ad apicem dehiscens, valvulis sejunctis, pedicello simul longitrorsum fisso.
Semina plurima in placentis angulato-alatis denique liberis peltatim affixa, sursum imbricata, compressa, nucleo oblongo ala membranacea margine denticulata ex toto ambitu cincto.
Embryo in axi albuminis carnosi rectus; cotyledonibus ovatis integris; radicula tereti, infera.
Arbores vel frutices sempervirentes, vallium Andinarum intertropicalium inter 10° lat. Sept. et 19° lat. Austr. altitudineque 1200-3270 metr. supra Oceani ripas incolæ; trunco ramisque teretibus; ramulis sæpius subtetragonis, cicatrices foliorum stipularumque delapsorum monstrantibus, harumce vestigiis in ramis adultis etiam conspicuis.
Cortex amarus, Quinina et Chinchonina fœtus. Peridermis varia: modo tenuissima valde adhærens, e solo subere confecta; modo incrassata et stratis squamiformibus, e parenchymate cellulari librove externo constantibus formata, natura frustulatim aliquando secedens, cæterum arte haud ægre solubilis.
Lignum albidum, demum flavescens, e stratis concentricis pro arboris ætate numero variis, radiisque medullaribus secundum caulis longitudinem singulariter protractis constans; cellulæ enim quibus isti conflantur hic horizontaliter extenduntur sicutique in radiis vulgo notis lateriformes seriem plerumque triplicem agunt, illic vero præter normam longitrorsum summopere protractæ seriem simplicem exhibent; quapropter radii in trunco nudato (adempto cortice) inspecti lineas exiles hinc et illinc brevi spatio ellipticeque dilatatas effingunt. Vasa porosa approximata, seriebus continuis simplicibus ordinata.
Medulla ramorum vulgo tetragona.
Folia opposita, integerrima, decrescenti-venosa, petiolata, glabra varie pubescentia vel tomentosa, planiuscula aut margine leviter revoluta; axillis venarum venularumque paginæ inferioris in nonnullis speciebus scrobiculatis; scrobiculis simplicissimis, vacuis aut succum adstringentem sudantibus. Epidermidis cellulæ, paginæ superioris præsertim, ambitu vulgo sinuosæ, in quibusdam speciebus humore translucido tumidæ, particulas foventes innumeras innatantes, oculo armato mirantique motu rapido quasi vitali trepidantes.
Petiolus limbo brevior, semicylindricus, subtus convexus, supra planus vel subcanaliculatus, rarissime in foliis arboris junioris teres.
Stipulæ interpetiolares plerumque liberæ citoque deciduæ vel basi leviter connatæ, intus ad basim glandulis minutis lanceolatis crebre consitæ.
Flores interdum fortuitu 4 vel 6-meri, cymoso-paniculati, albi vel sæpius carnei aut purpurascentes, mire fragrantes; paniculis terminalibus, ramulis pedicellisque basi bracteatis.
CHINCHONA CONDAMINEA.