A deuoute prayer for relygyous people / or for theym that entre in to relygyon. Remembrynge the termes / and to do theym in dede.
Hesu my maker & sauyour to thy wyll and ordynaûce I commytte me euery houre. Besechynge the entyerly for grace & mercy / so that I may be one of them that shall be saued. Teche me good lorde thy commaundementes to fulfylle / and to do that I come fore / eschewynge all euyll. Gyue me grace to loue the and to drede the aboue all thynge. Remembrynge thy grete benefettes / and euer to gyue the thankynge. And to kepe euer charyte / obedyence / pacyence / sylence / with humylyte / demynge euer the best / saye well / telle the trouthe / and neuer to lye. Lothe to offende / sory for my synne / and to helpe whan nede is / & to serue the euer deuoutly with mekenes to haue mede. Of ye trespaces of other to haue compassyon / wt good coûsell example & frendely consolacyon / & to do after good prechynge & holy sayntes lyues / kepynge my tonge & conscyence clene & to flee bacbytyng & stryues / & to gyue none occasyon of greuaûce neuer grutchyng / & flee ydelnes / & to praye for the deed & quycke alwaye be my besynes Takynge hede to my charges / & do to them with good wyll / gladde to be correcte of eche creature / & to leue myn owne wyll. And euer to be ware to excuse my synne / & to trust in myn owne wytte. Remêbrynge yt I come to relygyon for to do penaûce for synne / & repugne ayenst it / & to crye for mercy to the Ihesu & to thy moder Mary. In whome I trust & shall serue / & neuer for to varye Amen.
Domine fiat voluntas tua.
Sicut in celo et in terra.
Oratio Acciones nostras quesumus domine aspirando preueni et adiuuando prosequere. vt cûcta nostra operatio a te semper incipiat. et per te cepta finiatur. Per christum dominum nostrû Amen.