Panduntur omnes machinæ gyri tuæ,
Animæque vectes, trochleæ, cunei, rotæ;
Qua concitetur arte, quo sufflamine
Sistatur illa rursus, et constet sibi:
Nec, si fenestram pectori humano suam
Aptasset ipse Momus, inspiceret magis.
Hic cerno levia affectuum vestigia,
Gracilesque sensus lineas; video quibus
Vehantur alis blanduli cupidines,
Quibusque stimulis urgeant iræ graves.