Thirdlie, Shee declairs, that shee was at ane meiting with Isobell Brown, Alison Cairns, Margaret Dobson, and Beatrix Young, and that thai went all along to William Burnettis hous, he lying sick, and that coming to the hous, Margaret Dobson was in the liknes of ane black hen, and went in at the chimley head, and Beatrix Young in the liknes of a litill foall, and that hirself was in the liknes of ane litill quhelp; Isobell Brown wes in hir owin liknes, with a long tail'd courtshaw upon hir head, and Allison Cairns wes in hir owin liknes; and that Isobell Brown desired her to go into William Burnettis bot shee refuissed, quhairupon Isobell Brown did stryk her * * * * * on the back.
Fourtlie, Shee declairs that Marioun Robisson wes ane witch, and that shee was William Burnit's death.
(Signed)
Mr Samuel Douglas, Minister
at Coldinghame.
S. Lauder.
G. Halliday.
THE
DEPOSITION
OF
MENIE HALIBURTOUN.
At Dirltoun, June, 1649.
Compeirit Menie Halliburton, prissoner within the Castle, suspect of the cryme of witchcraft, delaitit guiltie be Agnes Clerkson, lait sufferer for the said cryme; as also be Patrik Watsone, spouse to the said Menie, who lykewisse sufferit thairfoir, and confessit, that auchtein yeir syne, or thairby, hir dochter being seik, scho first sent for Patrik Chrystison in Aberledie, to cum and cure hir dochter, and he refuising, went hirself for him, who refused to cure hir; and within * * * days after came the devill in liknes of a man into hir hous, calling himself a physition, and said to her, that he had good salves (and namelie oylispek), whairwith he would cure hir dochter; and aggreing with him for some of his salves quhilk he gave hir, shee gave him two Inglis shillings. He then departed, and promised to come agane within eight dayis, whilk accordinglie he did, bot or he went away the first tyme, shee gave him milk and breid; and Patrik Watsone coming in, he sent for a pynt of ale; bot at his second coming he stayit all night, and upon the morne airlie (Patrick being furth), in cam the divill and lay doun with hir, scho being yitt in bed, and had carnal copulatioun with hir, his nature being cald. He desyrit hir to renunce Chryst and hir baptisme, and become his servant, quhilk scho did. And sayis, that hir dochter had the wyte of all hir wickit wissing, and wissing she had nevir beene borne.
This deposition was renewed in all the particulars by the said Menie, in the foresaid place, on Sunday the first of July, 1649, before Alexander Levingston of Saltcoatts, James Borthwick chamberlane, James Lawder, John Stalker baillie, Wm. Dalzell, and Mr John M'Ghie, minister at Dirltoun.