"Seese thu nowe yone other waye,
That lygges lawe by nethe yone rysse?
Yone es the waye, the sothe to saye,
Vnto the joye of paradyse.
155 "Seese thu yitt yone third waye,
That ligges vnder yone grene playne?
Yone es the waye, with tene and traye,
Whare synfull saulis suffiris thare payne.
"Bot seese thu nowe yone forthe waye,
160 That lygges ouer yone depe delle?
Yone es the way, so waylawaye,
Vnto the byrnande fyre of hell.
"Seese thu yitt yone faire castelle,
That standes vpone yone heghe hill?
165 Of towne and towre, it beris the belle;
In erthe es none lyk it vntill.
"Ffor sothe, Thomas, yone es myn awenn,
And the kynges of this countree;
Bot me ware leuer hanged and drawen,
170 Or that he wyste thou laye me by.
"When thu commes to yone castelle gay,
I pray the curtase man to bee;
And whate so any man to the saye,
Luke thu answere none bott mee.
175 "My lorde es seruede at ylk a mese,
With thritty knyghttis faire and free;
I sail saye, syttande at the dasse,
I tuke thi speche byyonde the see."
Thomas still als stane he stude.
180 And he byhelde that lady gaye;
Scho come agayne als faire and gude,
And al so ryche one hir palfraye.
Hir grewe hundis fillide with dere blode;
Hir rachis couplede, by my faye;
185 Scho blewe hir horne with mayne and mode,
Vnto the castelle scho tuk the waye.
In to the haulle sothely scho went;
Thomas foloued at hir hande;
Than ladyes come, bothe faire and gent,
190 With curtassye to hit knelande.