"For to the grene-wood I maun gae,
To pu' the red rose and the slae;
To pu' the red rose and the thyme,
80 To deck my mother's bour and mine.
"I hadna pu'd a flower but ane,
When by there came a gallant hende,
Wi' high-coll'd hose and laigh-coll'd shoon,
And he seem'd to be sum kingis son.
85 "And be I a maid, or be I nae,
He kept me there till the close o' day;
And be I a maid, or be I nane,
He kept me there till the day was done.
"He gae me a lock o' his yellow hair,
90 And bade me keep it ever mair;
He gae me a carknet o' bonny beads,
And bade me keep it against my needs.
"He gae to me a gay gold ring,
And bade me keep it abune a' thing."—
95 "What did ye wi' the tokens rare,
That ye gat frae that gallant there?"—
"O bring that coffer unto me,
And a' the tokens ye sall see."—
"Now stay, daughter, your bour within,
100 While I gae parley wi' my son."—
O she has ta'en her thro' the ha',
And on her son began to ca';
"What did ye wi' the bonny beads
I bade you keep against your needs?
105 "What did you wi' the gay gold ring
I bade you keep abune a' thing?"—
"I gae them to a ladye gay,
I met on grene-wood on a day.