Gandeleyn lokyd hym est and lokyd west,
And sowt vnder the sunne,
He saw a lytil boy35
He clepyn Wrennok of Doune:
A good bowe in his hond,
A brod arewe therine,
And fowre and xx goode arwys
Trusyd in a thrumme.40
"Be war the, war the, Gandeleyn,
Herof thu xalt han summe:
"Be war the, war the, Gandeleyn,
Herof thu gyst plentè."
"Euere on for an other," seyde Gandeleyn,45
"Mysaunter haue he xal fle."
"Qwerat xal our marke be?"
Seyde Gandeleyn:
"Eueryche at otheris herte,"
Seyde Wrennok ageyn.50
"Ho xal zeue the ferste schote?"
Seyde Gandeleyn:
"And I xal zeue thè on beforn,"
Seyd Wrennok ageyn.
Wrennok schette a ful good schote,55
And he schet not too hye;
Throw the sanchothis of his bryk,
It towchyd neyther thye.
"Now hast thu zouyn me on beforn,"
Al thus to Wrennok seyde he,60
"And [throw] the myzt of our lady
A bettere I xal zeue the."
Gandeleyn bent his goode bowe,
And set therin a flo,
He schet throw his grene certyl,65
His herte he clef on too.
"Now zalt thu neuer zelpe, Wrennok,
At ale ne at wyn,
That thu hast slawe goode Robyn
And his knaue Gandeleyn.70
"Now xalt thu neuer zelpe, Wrennok,
At wyn ne at ale,
That thu hast slawe goode Robyn
And Gandeleyyn his [knave]."
Robyn lyzth in grene wode bow[n]dyn.