He hied him doun to yon change-house, 15
And he drank till the day was dawing;
And at ilka pint's end he drank the lass' health,
That was coming to pay for his lawing.
Aye he ranted, and aye he sang,
And drank till the day was dawing; 20
And aye he drank the bonnie lass' health,
That was coming to pay the lawing.
He spared na the sack, though it was dear,
The wine, nor the sugar-candy;
* * * *
* * * *
He has dune him to the shot-window, 25
To see gin she war coming;
There he saw the duke and a' his merry men,
That oure the hill cam rinning.
He has dune him to the landlady,
To see gin she wad protect him; 30
She buskit him up into woman's claise,
And set him till a baking.
Sae loudlie as they rappit at the yett,
Sae loudlie as they war calling;
"Had ye a young man here yestreen, 35
That drank till the day was dawing?"
"He drank but ae pint, and he paid it or he went,
And ye've na mair to do wi' the lawing."
They searchit the house a' round and round,
And they spared na the curtains to tear them; 40
While the landlady stood upo' the stair-head,
Crying, "Maid, be busy at your baking;"
They gaed as they cam, and left a' undone,
And left the bonnie maid at her baking.