Jhesus bad his dyscyple put up his swerd and ces,
And sett Malcus ere ageyn as hool as it was ere!
So mot y the, methowut it was a strawnge syth!
Whan we cam fyrst to hym, he cam us ageyn,
And haskyd whom we sowth that tyme of nyth?
We seyd Jhesus of Naȝareth, we wolde have hym fayn.
And he seyd, “it is I that am here in ȝour syth;”
With that word we ovyrthrowyn bakward everychone,
And some on her bakkys lyeng upryth,
But standyng upon fote manly ther was not on.