And go with us, now we ȝou pray!
And comfort oure Lord at hese departyng,
ffor he is almost redy to go his way.
Here thei xal take oure lady from the crosse, and here xal Pylat come down from his shaffald with Cayphas and Annas, and alle here mené; and xul come and lokyn on Cryst, and Annas and Cayphas xul skornfully seyn,
Cayphas. Lo! seres, lo! beholdyth and se,
Here hangyth he that halpe many a man;
And now yf he Goddys sone be,
Helpe now hymself yf that he kan.
Annas. ȝa! and yf thou kyng of Israel be,
Come down of the cros among us alle!