Tu medio stabilita mari, atque ingentibus undis
Cincta sedes; nec tu angusto, Vulcania tanquam
Trinacris, interclusa sinu; nec faucibus arctis
Septa freti brevis, impositisque coercita claustris.
Liberiora Tibi spatia, et porrecta sine ullo
Limite regna patent (quanto neque maxima quondam
Carthago, aut Phœnissa Tyros, ditissima tellus
Floruit imperio) confiniaque ultima mundi.
Ergone formidabis adhuc, ne se inferat olim,
Et campis impuné tuis superingruat hostis?