II.
Despise that shrimp, that wither'd imp,
With a' his noise an' caprin;
An' take a share with those that bear
The budget an' the apron!
An' by that stowp, my faith an' houpe,
An' by that dear Kilbaigie[15]!
If e'er ye want, or meet with scant,
May I ne'er weet my craigie.
An' by that stowp, &c.
RECITATIVO.
The Caird prevail'd—th' unblushing fair
In his embraces sunk;
Partly wi' love o'ercome sa sair,
An' partly she was drunk:
Sir Violino, with an air,
That show'd a man o' spunk,
Wish'd unison between the pair,
An' made the bottle clunk
To their health that night.
But hurchin Cupid shot a shaft,
That play'd a dame a shavie—
A sailor rak'd her fore and aft,
Behind the chicken cavie.
Her lord a wight o' Homer's craft,
Tho' limpan wi' the spavie,
He hirpl'd up an' lap like daft,
An shor'd[16] them Dainty Davie
O'boot that night.
He was a care-defying blade,
As ever Bacchus listed!
Tho' fortune sair upon him laid,
His heart, she ever miss'd it:
He had no wish but—to be glad,
Nor want but—when he thirsted;
He hated nought but—to be sad,
An' thus the Muse suggested
His sang that night.
AIR.
Tune—for a' that, an' a' that.
I.
I am a bard of no regard
Wi' gentle-folks, an' a' that;
But Homer-like, the glowran byke[17],
Frae town to town I draw that.