Their tricks an' craft hae put me daft,
They've ta'en me in, an' a' that;
But clear your decks, an' here's the Sex!
I like the jads for a' that.
For a' that, an a' that,
An' twice as muckle's a' that,
My dearest bluid, to do them guid,
They're welcome till't for a' that.
[POINT VII.]
RECITATIVO.
So sung the Bard—and Nansie's waws
Shook wi' a thunder of applause
Re-echo'd from each mouth!
They toom'd[18] their pokes, they pawn'd their duds[19],
They scarcely left to coor their fuds,
To quench their lowan drouth.
Then owre again, the jovial thrang,
The poet did request,
To lowse his pack an' wale a sang,
A ballad o' the best.
He, rising, rejoicing,
Between his twa Debōrahs,
Looks round him, an' found them
Impatient for the chorus.