Þe leude lystened ful wel, þat le3 in his bedde,
Þa3 he lowke3 his lidde3, ful lyttel he slepes;
Bi vch kok þat crue, he knwe wel þe steuen.
De-liuerly he dressed vp, er þe day sprenged,
For þere wat3 ly3t of a lau[m]pe, þat lemed in his chambre;
He called to his chamberlayn, þat cofly hym swared,
& bede hym bryng hym his bruny, & his blonk sadel;
Þat oþer ferke3 hym vp, & feche3 hym his wede3,
& grayþe3 me sir Gawayn vpon a grett wyse.
Fyrst he clad hym in his cloþe3, þe colde for to were;