Þis is a chapel of meschaunce, þat chekke hit by-tyde,
Hit is þe corsedest kyrk, þat euer i com inne!"
With he3e helme on his hede, his launce in his honde,
He rome3 vp to þe rokke of þo ro3 wone3;
Þene herde he of þat hy3e hil, in a harde roche,
Bi3onde þe broke, in a bonk, a wonder breme noyse,
Quat! hit clatered in þe clyff, as hit cleue schulde,
As one vpon a gryndelston hade grounden a syþe;
What! hit wharred, & whette, as water at a mulne,
What! hit rusched, & ronge, rawþe to here.