Bot snyrt hym on þat on syde, þat seuered þe hyde;
Þe scharp schrank to þe flesche þur3 þe schyre grece,
Þat þe schene blod over his schulderes schot to þe erþe.
& quen þe burne se3 þe blode blenk on þe snawe,
He sprit forth spenne fote more þen a spere lenþe,
Hent heterly his helme, & on his hed cast,
Schot with his schuldere3 his fayre schelde vnder,
Brayde3 out a bry3t sworde, & bremely he speke3;
Neuer syn þat he wat3 burne borne of his moder,
Wat3 he neuer in þis worlde, wy3e half so blyþe:—