& I schal ware alle my wyt to wynne me þeder,
& þat I swere þe for soþe, & by my seker traweþ."
"Þat is in-nogh in nwe ȝer, hit nedes no more,"
Quod þe gome in þe grene to Gawan þe hende,
"ȝif I þe telle trwly, quen I þe tape haue,
& þou me smoþely hatȝ smyten, smartly I þe teche
Of my hous, & my home, & myn owen nome,
Þen may þou frayst my fare, & forwardeȝ holde,
& if I spende no speche, þenne spedeȝ þou þe better,
For þou may leng in þy londe, & layt no fyrre,