Bot I am boun to þe bur barely to morne,
To sech þe gome of þe grene, as god wyl me wysse."
Þenne þe best of þe burȝ boȝed to-geder,
Aywan, & Errik, & oþer ful mony,
Sir Doddinaual de Sauage, þe duk of Clarence,
Launcelot, & Lyonel, & Lucan þe gode,
Sir Boos, & sir Byduer, big men boþe,
& mony oþer menskful, with Mador de la Port.
Alle þis compayny of court com þe kyng nerre,
For to counseyl þe knyȝt, with care at her hert;