His legeȝ lapped in stel with luflych greueȝ,
With polayneȝ piched þer-to, policed ful clene,
Aboute his kneȝ knaged wyth knoteȝ of golde;
Queme quyssewes þen, þat coyntlych closed
His thik þrawen þyȝeȝ with þwonges to-tachched;
& syþen þe brawden bryne of bryȝt stel ryngeȝ,
Vmbe-weued þat wyȝ, vpon wlonk stuffe;
& wel bornyst brace vpon his boþe armes,
With gode cowters & gay, & gloueȝ of plate,
& alle þe godlych gere þat hym gayn schulde