Tyffen he[r] takles, trussen her males,
Richen hem þe rychest, to ryde alle arayde,
Lepen vp lyȝtly, lachen her brydeles,
Vche wyȝe on his way, þer hym wel lyked.
Þe leue lorde of þe londe watȝ not þe last,
A-rayed for þe rydyng, with renkkeȝ ful mony;
Ete a sop hastyly, when he hade herde masse,
With bugle to bent felde he buskeȝ by-lyue;
By þat þat any day-lyȝt lemed vpon erþe,
He with his haþeles on hyȝe horsses weren.