Þer he watȝ þreted, & ofte þef called,
& ay þe titleres at his tayl, þat tary he ne myȝt;
Ofte he watȝ runnen at, when he out rayked,
& ofte reled in aȝayn, so reniarde watȝ wylé.
& ȝe he lad hem bi lag, mon, þe lorde & his meyny;
On þis maner bi þe mountes, quyle myd, ouer, vnder,
Whyle þe hende knyȝt at home holsumly slepeȝ,
With-inne þe comly cortynes, on þe colde morne.
Bot þe lady for luf let not to slepe,
Ne þe purpose to payre, þat pyȝt in hir hert,