As he sprent ouer a spenné, to spye þe schrewe,
Þer as he herd þe howndes, þat hasted hym swyþe,
Renaud com richchande þurȝ a roȝe greue,
& alle þe rabel in a res, ryȝt at his heleȝ.
Þe wyȝe watȝ war of þe wylde, & warly abides,
& braydeȝ out þe bryȝt bronde, & at þe best casteȝ;
& he schunt for þe scharp, & schulde haf arered,
A rach rapes hym to, ryȝt er he myȝt,
& ryȝt bifore þe hors fete þay fel on hym alle,
& woried me þis wyly wyth a wroth noyse.