Saf þat þou schal siker me, segge, bi þi trawþe,
Þat þou schal seche me þi-self, where-so þou hopes
I may be funde vpon folde, & foch þe such wages
As þou deles me to day, bifore þis douþe ryche."
"Where schulde I wale þe," quod Gauan, "where is þy place?
I wot neuer where þou wonyes, bi hym þat me wro3t,
Ne I know not þe, kny3t, þy cort, ne þi name.
Bot teche me truly þer-to, & telle me howe þou hattes,
& I schal ware alle my wyt to wynne me þeder,
& þat I swere þe for soþe, & by my seker traweþ."