On Gryngolet, þat þe grace hade geten of his lyue;
Ofte he herbered in house, & ofte al þeroute,
& mony a-venture in vale, & venquyst ofte,
Þat I ne tyȝt, at þis tyme, in tale to remene.
Þe hurt watȝ hole, þat he hade hent in his nek,
& þe blykkande belt he bere þeraboute,
A belef as a bauderyk, bounden bi his syde,
Loken vnder his lyfte arme, þe lace, with a knot,
In tokenyng he watȝ tane in tech of a faute;
& þus he commes to þe court, knyȝt al in sounde.