It is thocht universallie meit, that through the haill countries there be orderly sett downe Presbytries in the places underwritten, quhilks are judgit most proper and convenient therefore, to the number following, viz. In Orknay, ane within the Toune of Kirkwall: In Zetland, ane within the Toune of {blank space}: In Cathnes 2, Thurso and Dornock: In Ross 2, ane in Tare and uther in Channonrie: In Morray 4, viz. Inverness, Forress, Elgine, and Ruthven: In Aberdeine 5, viz. Fordoune, Dier, Innerowrie, Aberdeine, and Kincardine: In Mearnes ane, viz. in Bervie: In Anguss 3, viz. Montrose, Dundie, Brechine: In Dunkeld ane: In Perth ane: In Dumblaine ane: In Striviling ane: In Lowthiane 5, Lynlithgow, Edinburgh, Haddingtowne, Dalkeith, Dumbar: In Fyfe 4, Cowper, St Androis, Dunfermling, Kirkcaldie: In Merss, Churnsyde: In Teviotdale 3, Melross, Jedburgh, Kelso: In Twedell, Peebles: In Annandaill, Muffet: In Nithesdaill 2, Drumfreiss, Sanchar: In Galloway 4, Glenluis, Wigtowne, Kirkcudbright, St Johnes Clawchane: In Carrick, Mayboll: In the Shreffdome of Aire,—Aire, in Cunninghame, in Irwing: In Ranfrew, Pasley: In Lennox, Dumbartane: In the Nether Ward of Cliddesdall: In the Over Ward 2, Lanerick and Biggar. And to the effect that the kirks qwhilk most propperlie sould be unite to every Presbytrie may be joynit thereto, qwhairupon the Presbytries may be erectit conveniently, the Assembly ordaynes Commissioners for ilk Sheriffdome.
Sessio 5.
The breither appoyntit to give in the names of the kirks as they thocht maist properlie might be casten in to the Presbytries, pronuncit their judgements in wreit, qwhilk were delyvrit to my Lord Clark Register, qwhom the Kirk requestit to visite and consider, and to giue his judgement thereof. As to the places qwhare the Synodall Assemblies shall be halden and the day of their next conventione; it is thocht meit that thair next Assemblies shall begine the first Tuesday of October nixt to come in the particular places following, qwhare being conveinit, they shall chuse at their awne optione the same, or such other places within their bounds as they think maist expedient thereafter; and so furth from tyme to tyme, as they shall appoynt and think meitest for the first tyme.
The Synodall of Orknay in Kirkwall: of Kaithnes in Dornock: of Ross in the Channonrie: off Morray in Elgine: off Bamff in Torrey: off Aberdeen in Aberdeine: off Angus in Mernes in Brechine: off Dunkeld in Dunkeld: off Dunblaine: off Fyffe and Perth in St Androis: off Lowthiane in Edinburgh: off Merss, Teviotdale, and Tweddall, in Lawder: off Nithsdaill in Drumfries: off Galloway in Wigtowne: off Kyle, Carrick, and Cuninghame, in Aire: off Cliddsdale, Ranfrew, and Lennox, in Glasgow.
The haill Kirk requestit my Lord Secretar to intreat with his Majestie, that the Generall Assemblie may be yearly heirafter observed, and to understand quhat tyme his Majestie thinks meet for the next conventione.
Anent the doubt movit, if it be leisum to any towne or citie quhare there is ane Universitie, and ane pairt of the parochine of the said towne lyand to landwart, but thair consents and votes, to elect ane minister to the haill paroche and universitie, pretending the priviledge of ane old use and custome: The Kirk hes votit thereto negando, that it is not leisome so to doe.
Sessio 6.
Anent the heid read afternoone, referrit to farther deliberatione: the Moderator declairit that the matter in a pairt being reasonit in privie conferrence, they had pennit two articles, quhilk they thocht good the Assembly sould judge upon, and to vote to the same if they find it expedient; quhilk being read and advysit with, the haill brethren gave consent thereto; of the quhilks articles this is the tennor:
It is found that all such as the Scripture appoynts Governours of the Kirk of God, as, namely, Pastors, Doctors, and Elders, may convene to Generall Assemblies and vote in ecclesiasticall matters; and all uthers that hath any sute or uther things to propone to the Assemblie may be there present, to giue in their sutes, and propone things profitable to the Kirk, and hear reasoning, but shall not vote: 2. There are four offices ordinare sett down to us be the Scripture, to witt, Pastors, Doctors, Elders, and Deacones, and the name of a Bischop ought not to be taken as it hath been in Papistrie; but it is commone to all pastores and ministers.
Mr David Cunninghame, Bischop of Aberdeene, is ordainit to be summoned before the Presbytrie of Glasgow, for abusing his bodie in adulterie with Elspeth Sudderland.